PrintClose

اسلام آباد (م ڊ) نيب اڳوڻي وزيراعظم نواز شريف ۽ سندس گهرڀاتين خلاف ريفرنسز داخل ڪرڻ کان اڳ جي آءِ ٽي جي ميمبرن جا بيان رڪارڊ ڪرڻ جو فيصلو ڪيو آهي، ان سلسلي ۾ سپريم ڪورٽ کي درخواست به ڏني وئي آهي، جي آءِ ٽي ميمبرن جو بيان رڪارڊ ڪرڻ جي متفرق درخواست سپريم ڪورٽ طرفان مقرر ڪيل نگران جج جسٽس اعجاز الاحسن کي ڏني وئي آهي، جنهن ۾ چيو ويو آهي ته ميمبرن جو بيان رڪارڊ ڪرڻ چاهيون ٿا، ذريعن موجب نيب ان سلسلي ۾ جي آءِ ٽي سربراهه واجد ضياءَ سان به رابطو ڪيو آهي، جنهن تي هن ان حوالي سان سپريم ڪورٽ سان رابطو ڪرڻ جي تجويز ڏني، واجد ضياءُ جي تجويز تي نيب اختيارين نگران جج کي اپيل ڪئي آهي ته جي آءِ ٽي ميمبرن کي نيب جي جاچ آفيسر سامهون بيان رڪارڊ ڪرائڻ جو حڪم ڏنو وڃي، واضح رهي ته سپريم ڪورٽ 8 جولاءِ تي پنهنجي فيصلي ۾ نيب کي 6 هفتن ۾ شريف خاندان ۽ ٻين ادارن خلاف ريفرنسز داخل ڪرڻ جو حڪم ڏنو هو.