PrintClose

ٽنڊوڄام (ت ر) عدالتي فيصلي کانپوءِ سنڌ پوليس جي آءِ جي کي سنڌ جي وڏي وزير کان وڌيڪ اختيار ملي ويا آهن، رائو انوار معاملي سميت سنڌ ۾ ”فل ۽ هاف فراءِ“ ۽ ٻين پوليس مقابلن جي ذميواري آءِ جي سنڌ پوليس تي آهي، آءِ جي کي شفاف جاچ ڪرائي ڪوڙا مقابلا ڪندڙ آفيسرن خلاف ڪارروائي ڪرڻ گهرجي، اهڙن خيالن جو اظهار پاڪستان پيپلز پارٽي سنڌ جي اطلاعات سيڪريٽري ۽ سينيٽر عاجز ڌامراهه پريس ڪلب ٽنڊوڄام ۾ ميٽ دي پريس کي خطاب دوران ڪيو، هن وڌيڪ چيو ته جيڪڏهن حڪومتي ايگزيڪيوٽو آرڊر ڪورٽون پاڻ وٽ رکنديون ته پوءِ صوبائي حڪومت جو ڪهڙو ڪردار رهجي ٿو وڃي؟ آءِ جي سنڌ جي معاملي تي عدليه جو فيصلو سواليه نشان بڻيل آهي، آءِ جي معاملي تي سنڌ حڪومت جي ڪيل فيصلن سميت وفاقي سليڪشن بورڊ تحت پروموشن حاصل ڪندڙ مجيد دستي کي 22 هون گريڊ هجڻ باوجود به آءِ جي جي چارج وٺڻ کان روڪي 21 گريڊ جي جونيئر کي ئي حد کان وڌيڪ اختيار ڏنا ويا آهن، هن چيو ته عدليه آءِ جي سنڌ کي اهي اختيار به ڏئي ڇڏيا آهن، جيڪي هن گهريا ئي ڪونه هئا، عدليه هڪ طرف او پي ايس تي ڪم ڪندڙ آفيسرن کي هٽائي ڇڏيو آهي ته ٻئي طرف سنڌ ۾ آءِ جي کي او پي ايس تي مقرر ڪيو آهي، جيڪو سواليا نشان آهي، هن چيو ته چونڊيل حڪومت کي پنهنجو ڪم ڪرڻ ڏنو وڃي ۽ ان جو فيصلو عوام تي ڇڏيو وڃي، جيڪو عوام ووٽ ذريعي فيصلو ڪري، هن وڌيڪ چيو ته مريم نواز ٻڌائي ته سندس پيءُ جي حڪومت جنرل مشرف کي ملڪ کان ٻاهر ڇو وڃڻ ڏنو؟ آصف زرداري تي الزام هڻندڙ مريم نواز کي خبر هجڻ گهرجي ته جنرل مشرف تي آرٽيڪل 6 آصف زرداري ئي لڳائي عهدو ڇڏڻ تي مجبور ڪيو، 17 هين ترميم جي منظوري ڏيندڙ جنرل مشرف جا ساٿي هن وقت نواز ليگ جا اتحادي آهن، ملڪ کي سياسي ۽ معاشي بحران مان فقط پيپلز پارٽي ئي ڪڍي سگهي ٿي. ان موقعي تي پيپلز پارٽي ضلعي حيدرآباد جو اطلاعات سيڪريٽري اسماعيل وساڻ، گلزار ڪليري، لياقت ڪليري، عبدالرزاق شيخ، منير احمد رتڙ ۽ ٻيا پڻ موجود هئا.