PrintClose

اسلام آباد (رپورٽ: اصغر خاڻوٺي) وفاقي حڪومت جي هٺ ڌرمي سبب ارسا ۾ سنڌ جي ميمبر جي توسيع وارو معاملو رولڙي جو شڪار، اڳوڻي وزيراعظم جي منظوري باوجود پاڻي بجلي وزارت موجوده ميمبر جي توسيع جو نوٽيفڪيشن جاري نه ڪيو، تفصيل موجب پاڻي بجلي وزارت جي هٺ ڌرمي سبب ارسا ۾ سنڌ جي ميمبر مظهر شاهه جي توسيع وارو معاملو اڃا تائين رولڙي جو شڪار بڻيل آهي، واضح رهي ته پاڻي بجلي وزارت مظهر شاهه جي وڏي عمر جو جواز ڄاڻائي ان جي مدت ۾ توسيع بابت سنڌ حڪومت جي درخواست کي رد ڪري ڇڏيو هو، جنهن کانپوءِ سنڌ جي وڏي وزير سيد مراد علي شاهه پاڻي بجلي وزارت جي اهڙي رويي تي سخت احتجاج ڪندي ان وقت جي وزيراعظم ميان نواز شريف کي خط لکيو هو، جنهن ۾ سنڌ وفاق سان احتجاج ڪندي موقف اختيار ڪيو هو ته اهو سنڌ جو صوابديد آهي ته اهو ڪنهن کي به ميمبر نامزد ڪري ان لاءِ عمر جي حد جي ڪا به پابندي ناهي، تنهن ڪري ارسا ۾ سنڌ جي موجوده ميمبر جيڪو ارسا جو چيئرمين به آهي، ان جي مدت ۾ توسيع ڪئي وڃي. وڏي وزير جي اهڙي احتجاجي خط کانپوءِ ان وقت جي وزيراعظم ميان نواز شريف پنهنجي نااهلي کان 10 ڏينهن اڳ پاڻي ۽ بجلي وزارت کي هدايت ڪئي ته سنڌ جي موجوده ميمبر جي مدت ۾ توسيع بابت سنڌ حڪومت جي موقف مطابق موجوده ميمبر جو نوٽيفڪيشن جاري ڪيو وڃي پر پاڻي بجلي وزارت اڃا تائين ان حوالي سان نوٽيفڪيشن جاري نه ڪيو آهي، جنهن ڪري نئين ميمبر جي مقرري وارو معاملو اڃا تائين حل نه ٿي سگهيو آهي.