PrintClose

ڪراچي (رپورٽ: وحيد گل ميمڻ) ايم ڪيو ايم لنڊن جي اڳواڻن اڳوڻي وفاقي وزير بابر غوري، اڳوڻي  وفاقي وزير مواصلات شميم صديقي، ڊاڪٽر نديم ۽ ثقافت کاتي جي اڳوڻي وزير عنبر خان پارٽي عهدن تان استيعفيٰ ڏئي ڇڏي، ذريعن موجب ٽنهي اڳواڻن پارٽي جي بنيادي ميمبر شپ تان استعيفيٰ ڏيندي استيعفيٰ لنڊن موڪلي ڇڏي آهي، ان سلسلي ۾ اڳوڻي وفاقي وزير بابر غوري جو چوڻ آهي ته  پارٽي جي بنيادي ميمبر شپ تان استعيفيٰ ڏيڻ منهنجو ذاتي فيصلو آهي، پارٽي جي سمورين ذميوارين تان هٿ کڻي رهيو آهيان. هن چيو ته مان في الحال ڪنهن سياسي پارٽي يا گروپ ۾ شامل نه ٿي رهيو آهيان. سندس چوڻ هو ته پاڪستان ۾ جيڪا ايم ڪيو ايم آهي تنهن جو ڪڏهن به حصو نه رهيو آهيان، ايم ڪيو ايم هڪ ئي آهي جيڪا لنڊن ۾ آهي. بابر غوري چيو ته ايم ڪيو ايم پاڪستان ٻي پي ايس پي آهي، ٻنهي پارٽين جو انضمام ڪامياب ٿيو ته سٺي ڳالهه آهي، مهاجر هن وقت محرومين جو شڪار آهن. هن چيو ته مان هڪ سال کان غيرفعال هيس جيڪا سياست پاڪستان ۾ ٿي رهي آهي تنهن جو حصو نه ٿو بڻجڻ چاهيان، اهو ئي سبب آهي جو مون پارٽي تان استعيفيٰ ڏني آهي. سندس چوڻ هو ته ڪراچيءَ ۾ جيڪا سياست ٿي رهي آهي اها ذاتي مفادن جي سياست ٿي رهي آهي، پي ايس پي ۽ ايم ڪيو ايم جي ماڻهن کي انا هڪ پاسي رکي گڏ ٿيڻ گهرجي. بابر غوري چيو ته فيصلو عوام تي ڇڏڻ گهرجي عوام جنهن کي پسند ڪندو تنهن کي چونڊن ۾ ووٽ ڏيندو. ٻئي پاسي اڳوڻي وفاقي وزير شميم صديقي جو چوڻ آهي ته اڻٽر سببن جي ڪري پارٽي ذميوارين ۽ بنيادي ميمبرشپ تان استعيفيٰ جو فيصلو منهنجو ذاتي آهي. هن چيو ته سندس فيصلو مهاجر عوام جي حق ۾ سياسي ۽ غير سياسي مفادن کان مٿڀرو ٿي ڪيو ويو آهي. هوڏانهن ثقافت ۽ راندين واري اڳوڻي وزير عنبر خان به متحده لنڊن  جي پارٽي ميمبر شپ تان استعيفيٰ ڏئي ڇڏي آهي. سندس چوڻ آهي ته ايم ڪيو ايم لنڊن ۽ ايم ڪيو ايم پاڪستان هڪ ئي آهن.