PrintClose

اسلام آباد (م ڊ) اليڪشن ڪميشن قومي اسيمبلي جي تڪ اين اي 120 جي ضمني چونڊن لاءِ قيدين جو ووٽ ٽپال ذريعي ڪاسٽ ڪرائڻ جو فيصلو ڪري ورتو آهي. ميڊيا رپورٽ مطابق اليڪشن ڪميشن چيف سيڪريٽري پنجاب کي باضابطا طور خط موڪلي ڇڏيو آهي، جنهن ۾ چيو ويو آهي ته اين اي 120 جا رهائشي مختلف ڏوهن ۾ قيد جوابدارن ۽ ڏوهارين جا ووٽ وجهڻ جا انتظام ڪيا ويندا. ان کان علاوه هن تڪ جي رهواسي نظربند شهرين کي به ٽپال ذريعي ووٽ جو حق استعمال ڪرڻ ڏنو وڃي. ان سلسلي ۾ اين اي 120 ۾ ٽپال ذريعي ووٽ وجهڻ لاءِ قيد ۽ نظربند جوابدارن جي ڊيٽا گڏ ڪئي پئي وڃي. اين اي 120 جي جيلن ۾ قيد ووٽر 6 سيپٽمبر تي ٽپال ذريعي ووٽ ڪاسٽ ڪري سگهندا. ان کان علاوه ٻين شهرن ۾ مقرر عسڪري ۽ سول سرڪاري اهلڪارن ۽ ٻيا ماڻهو به پوسٽل بيلٽ ذريعي ووٽ ڪاسٽ ڪري سگهندا. ان لاءِ 26 آگسٽ تي اين اي 120 جي ضمني چونڊ لاءِ اميدوارن جي حتمي فهرست بعد پوسٽل بيلٽ پيپر ووٽرز کي ڏنا ويندا، جڏهن ته اين اي 120 جي قيد ۽ نظربند شهري 30 آگسٽ تائين پوسٽل ووٽنگ لاءِ درخواستون ڏئي سگهندا.