PrintClose

حيدرآباد(بيورو رپورٽ) حيدرآباد سول اسپتال جي انتظاميا پاران هڪ کان 5 گريڊ لاءِ خالي پيل جاين تي ڀرتين لاءِ سڌي ريت واڪ ان انٽرويو ڏيڻ لاءِ ڪالهه حيدرآباد ۽ ڀرپاسي مان هزارين اميدوار سول اسپتال جي او پي ڊي ۾ پهتا، هزارن جي تعداد ۾ اميدوارن جي پهچڻ سبب انتظاميا انٽرويو ملتوي ڪري ڇڏيا، انٽرويو جي تاريخ ۽ هنڌ جو ٻيهر اعلان ڪيو ويندو. ان سلسلي ۾ مليل ڄاڻ موجب سول اسپتال حيدرآباد جي انتظاميا خالي پيل 151 سيٽن تي انٽرويو لاءِ ڪالهه حيدرآباد سميت سڄي سنڌ مان هزارين بيروزگار نوجوان انٽرويو ڏيڻ لاءِ سول اسپتال جي او پي ڊي ۾ پهچي ويا، وڏي انگ ۾ نوجوانن جي پهچڻ سبب اسپتال انتظاميا لاءِ انٽرويو وٺڻ وڏو مسئلو بڻجي ويو، سخت بدنظمي پيدا ٿيڻ سبب انتظاميا صورتحال کي ضابطي ۾ آڻڻ ۾ پڻ ناڪام وئي، سول اسپتال انتظاميا اسٽور ڪيپر، وارڊ سرونٽ،  نائب قاصد ۽ واٽر مين سميت مختلف عھدن لاءِ سنڌ جي حيدرآباد،  ڄامشورو ۽ دادو سميت مختلف ضلعن جي اميدوارن کي واڪ ان انٽرويو لاءِ طلب ڪيو ھو، جنھن لاءِ نوڪري جي اميد کڻي سول اسپتال حيدرآباد ۾ ھزارين نوجوان ڪاغذ کڻي انٽرويو لاءِ پھتا هئا،  انتظاميا انٽرويو وٺڻ بدران رڳو اميدوارن کان درخواستون وصول ڪيون، جڏھن ته نوجوانن جي پيهه سبب انتظاميا انھن کي سنڀالي نه سگھي ۽ اميدوارن کي قطارن ۾ بيھارڻ بدران گڏيل طور اندر ڇڏيو ويو، جنھن بعد اھلڪارن ۽ اتي موجود سيڪيورٽي عملي نوجوانن کي ڌڪا ڏئي اندران ٻاھر ڪڍي ڇڏيو، سول اسپتال جي انتظاميا  انتظام  مڪمل نه ڪيا ھئا، جنھنڪري واڪ ان انٽرويو وارو مرحلو بدنظمي جو شڪار ٿي ويو، سخت ڇڪتاڻ سبب اميدوارن کي پوليس اهلڪار ۽ سيڪيورٽي عملي ڌڪا ڏئي ڊوڙائي ڇڏيو، جڏهن ته ٻئي پاسي بد نظمي سبب انٽرويو لاءِ پهتل سوين اميدوار درخواستون جمع نه ڪرائي سگهيا. هوڏانهن سول اسپتال حيدرآباد جي ترجمان موجب انتظاميا نوڪرين لاءِ رٿيل واڪ ان انٽرويو ملتوي ڪرڻ جو اعلان ڪندي چيو آهي ته واڪ ان انٽريو جو ٻيهر اعلان ڪيو ويندو، ان سلسلي ۾ اسپتال جي ترجمان موجب سول اسپتال جي ايم ايس ڊاڪٽر عبدالوهاب وڌو خالي پيل آسامين تي ڀرتين لاءِ نئين تاريخ ۽ نئين هنڌ جو ٻيهر اعلان ڪندو، ترجمان موجب اهڙو فيصلو انٽرويو ڪاميٽي جي صلاح مشوري سان ڪيو ويو، ڇو ته اميدوار توقع کان وڌيڪ اچي ويا هئا، جن کان هڪ ئي وقت درخواستون وصول ڪرڻ ۽ انٽرويو وٺڻ ممڪن نه هو.