PrintClose

مانسهره (مانيٽرنگ ڊيسڪ) پ پ جي چيئرمين بلاول ڀٽو زرداري چيو آهي ته ن ليگ ۽ پي ٽي آءِ رجعت پرست آهن، نواز شريف ڏڦيڙي ۽ سازشي ٿي سگهي ٿو انقلابي نه، عوام سندس دوکي ۾ نه ايندو، خانصاحب! هاڻي توهان جي ڪوڙ، پروپئگنڊا ۽ گارين واري سياست نه هلندي، 2018ع واري اليڪشن منهنجي پهرين ۽ توهان جي آخري اليڪشن هوندي، ڪالهه مانسهره ۾ عوامي جلسي کي خطاب ڪندي بلاول ڀٽو زرداري چيو ته توهان ڪجهه ڏينهن اڳ جي ٽي روڊ تي تماشو ڏٺو، ميان صاحب جون رڙيون ٻڌيون، هو انقلاب، آئين ۽ قانون جي ڳالهه ڪري رهيو آهي ۽ پنهنجين تقريرن ۾ ماڻهن کان واعدا وٺي رهيو هو، ميان صاحب! توهان ڪيتريون به رڙيون ڪريو پر عوام توهان جي دوکي ۾ نه ايندو، ڇاڪاڻ ته توهان ادارن تي دٻاءُ وڌائڻ لاءِ ماڻهن کي روڊن تي آڻڻ جي ڌمڪي ڏئي رهيا آهيو، هن چيو ته ميان صاحب توهان معصوم نه پر مجرم آهيو، توهان ملڪ جي دولت لٽي، عوام سان ڪوڙ ڳالهايو، جعلسازي ڪئي، پوءِ چئو ٿا ته مون کي ڇو ڪڍيو ويو؟ نواز شريف! انقلاب جي ڳالهه توهان جي منهن مان نڪرندي سٺي نٿي لڳي، توهان کي ڪهڙي خبر ته انقلاب ڇا ٿيندو آهي؟ ڇا توهان ڪڏهن انقلاب پڙهيو آهي؟ توهان سازشي ٿي سگهو ٿا پر انقلابي نٿا ٿي سگهو، توهان ڇانگا مانگا جي سياست شروع ڪئي، آءِ جي آءِ ٺاهي، شهيد بينظير ڀٽو جي حڪومت ڪيرائڻ لاءِ اساما کان پئسا ورتا، ان ڪري اوهان فسادي ۽ سازشي ٿي سگهو ٿا پر انقلابي نٿا ٿي سگهو، ڇا توهان ڪڏهن آئين جي پاسداري ڪئي؟ ٻڌايو ته گهڻا ڀيرا اسيمبلي ۾ ويا آهيو؟ جڏهن به توهان جي ڪرسي کي خطرو پيش آيو ته توهان پارليامينٽ جي ڳالهه ڪئي، ميان صاحب! توهان جي معاشي پاليسين سبب غريب وڌيڪ غريب ٿيندو ويو، توهان غريبن جي منهن مان گرهه کسي ورتو آهي، ترقي جي نالي تي اربين رپيا ضايع ڪري ڇڏيا آهن، ٻڌايو ته ڪهڙي ترقي ٿي آهي، پئسو رڳو توهان جي کيسن ۾ ويو آهي، بلاول ڀٽو زرداري وڌيڪ چيو ته هڪ طرف ميان صاحب ماڻهن کي روڊن تي آڻڻ جون ڌمڪيون ڏئي پيو ته ٻئي طرف خانصاحب آئين ۾ ترميم خلاف ماڻهو ميدان ۾ آڻڻ جون ڳالهيون ڪري پيو، ٻنهي جي نظر صرف ڪرسي تي آهي، ٻنهي کي ملڪ جي ڪابه ڳڻتي ناهي، ٻئي رجعت پرست پارٽيون آهن، هن چيو ته ملڪ سنگين حالتن مان گذري پيو، عالمي طور اسين ڪٿي بيٺل آهيون، اهي ٻئي اڳواڻ پاڻ کي وڏا ليڊر سمجهن ٿا پر ماڻهن جي مسئلن جي ڳالهه نٿا ڪن، هنن وٽ مسئلن جو ڪوبه حل ناهي، پ پ نظرياتي پارٽي آهي، اڳ ۾ به ملڪ کي نازڪ دور مان ڪڍيو، عوام جا مسئلا حل ڪيا، اسين ايندڙ اليڪشن ۾ مڪمل منشور سان لهنداسين، هر شعبي لاءِ پاليسي ٺاهينداسين، اسان جو منشور پورهيت، هاري، غريب، عوام ۽ شاگرد دوست منشور هوندو، روزگار جا نوان رستا ڳولينداسين، عورتن کي برابري جا حق ڏينداسين، مون کي الله تعاليٰ جي مدد ۽ توهان جي طاقت کپي، آئون عوام جي طاقت ۾ يقين رکان ٿو، اقتدار صرف پنهنجي ۽ پارٽي لاءِ نه پر عوام جي لاءِ اقتدار چاهيان ٿو، هن ڪارڪنن کي مخاطب ٿيندي چيو ته ڇا توهان منهنجو ساٿ ڏيندؤ؟ جيڪڏهن توهان منهنجو ساٿ ڏنو ته آئون مايوس نه ڪندس، مون کي ملڪ کي اڳتي وڌائڻ کان ڪير به روڪي نه سگهندو، اسين ملڪ کي خوشحال بڻائينداسين، بلاول ڀٽو پي ٽي آءِ سربراهه عمران خان تي تنقيد ڪندي چيو ته خانصاحب توهان چئو ٿا ته ليڊر کي صادق ۽ امين هجڻ گهرجي پر توهان ماڻهن سان ڪوڙ ڳالهايو ٿا، توهان چئو ٿا ته توهان تاريخ ۾ پهريون ڀيرو ڪنهن وزير کي گرفتار ڪيو آهي، واهه سائين واهه، ٻڌايو ته توهان جي وڏي وزير تي ڪرپشن جا الزام آهن، انهن جو ڇا ٿيندو؟ توهان جي احتساب ڪميشن ڪٿي ستل آهي؟ مائيننگ جي ٺيڪن ۾ اربين رپين جي ڪرپشن جي انڪوائري ڪڏهن ٿيندي؟ آئون نه پر توهان جا ئي ماڻهو چون ٿا ته ڪي پي ڪي جي ٺيڪن مان عمران خان جو رڌڻو ۽ جهانگير ترين جو جهاز هلي ٿو، خانصاحب! توهان ته رڳو نئين نئين ۽ تبديلي تبديلي جي ڳالهه ڪريو ٿا، ٻڌايو ته ڪهڙي تبديلي آندي آهي؟ تعليم ۽ صحت جا شعبا سڀني جي سامهون آهن، بيروزگار ڊگريون کڻي دربدر ٿي رهيا آهن، اسپتالن جي حالت خراب آهي، توهان عوام سان ڪوڙ پيا ڳالهايو ته تعليمي شعبي ۾ انقلاب آندو آهي، ڪي پي ڪي جي اسڪولن جي حالت سڀني جي سامهون آهي، هڪ به سرڪاري اسڪول پوزيشن ناهي کنئي، توهان خانگي اسڪولن کي ترقي وٺرائي رهيا آهيو ۽ تعليمي شعبي کي خانگائي رهيا آهيو، هن چيو ته خانصاحب! توهان اڄ ڪلهه دهشتگردي ۾ گهٽتائي جو ڪريڊٽ پاڻ تي کڻي رهيا آهيو، ڇا توهان ڪڏهن دهشتگردي بابت ڳالهايو آهي، ماڻهن جو حافظو ڪمزور ناهي، توهان ته طالبان کي آفيس کولي ڏيڻ جي آڇ ڪئي، انهن جي هڪ مدرسي کي ڪروڙين رپيا ڏنا، توهان ته دهشتگردي خلاف آپريشن جي مخالفت ڪئي! هن چيو ته خانصاحب دهشتگردي ۾ گهٽتائي سيڪيورٽي فورسز، پوليس ۽ قوم جي يڪجهتي سبب آئي آهي، توهان جي حڪومت جو ڪو ڪارنامو ناهي، بلاول ڀٽو وڌيڪ چيو ته توهان صوبي جي حقن لاءِ ڪڏهن ڳالهه ڪئي، عوام جي ڀلائي لاءِ ڪڏهن آواز اٿاريو، ڇا توهان عوامي حقن لاءِ ڪڏهن ڌرڻو هنيو، توهان ته رڳو هتان جي عوام کي پنهنجي سياست لاءِ استعمال ڪيو آهي، بلاول ڀٽو وڌيڪ چيو ته پيپلز پارٽي بيگم نصرت ڀٽو ڪينسر اسپتال شروع ڪئي پر خانصاحب سياسي دشمني سبب اها بند ڪري ڇڏي، کيس ٻڌائڻ چاهيان ٿو ته اها اسپتال غريبن لاءِ هئي، توهان کي صرف شوڪت خانم اسپتال جي ڳڻتي هوندي آهي، جيڪڏهن بيگم نصرت ڀٽو جي نالي تي توهان کي اعتراض هو ته ان پروگرام جو نالو به شوڪت خانم رکي ڇڏيو ها.