PrintClose

سکر: انگريز دور ۾ تعمير ٿيل سکر بئراج کي 66 دروازا لڳايا ويا، جنهن مان 10 دروازا ٽيڪنيڪل سببن جي ڪري بند ڪيا ويا، هينئر 56 دروازا موجود آهن، انهن دروازن جي حفاظت لاءِ هر سال جنوري مهيني ۾ پاڻي جي وارا بندي دوران سموري اسٽريڪچر جو جائزو وٺي رنگ روغن وارو ڪم ڪيو وڃي ٿو، هن ڀيري به ايريگيشن کاتي جي ٽيڪنيڪل ٽيم 6 جنوري تي پاڻي ڇوڙ بند ڪرڻ کانپوءِ درياهه ۾ لهي سمورن دروازن، بئراج جي پلرن ۽ پاڪيٽس جو جائزو ورتو، اسڪريننگ ڪرڻ بعد رپورٽ ايڪسيئين سکر بئراج حوالي ڪئي وئي، جنهن کانپوءِ 20 جنوري جي ڏينهن ۽ 21 جنوري جي رات بئراج جا دروازا معمول مطابق بند ڪري ڪئنالن کي کوليو ويو، سکر بئراج مان نڪرندڙ 7 ڪئنالن ۾ 6 ڪئنالن ۾ پاڻي ڇوڙ ڪيو ويو جڏهن ته سيزنل ڪئنال هجڻ ڪري رائيس ڪئنال بدستور بند آهي، ايريگيشن کاتي جي عملدارن موجب رائيس ڪئنال سنڌ جي مختلف شهرن کان سواءِ بلوچستان جي علائقن کي به پاڻي پهچائڻ جو ذريعو آهي، چانورن جي فصل لاءِ رائيس ڪئنال مان پاڻي جي گهرج پوري ڪئي ويندي آهي جنهن ۾ اپريل جي مهيني کان آڪٽوبر جي مهيني تائين خريف جي فصل لاءِ پاڻي جي فراهمي کي يقيني بڻايو ويندو آهي.