PrintClose

ڪراچي (رپورٽ: وحيد گل ميمڻ) پاڪستان پيپلز پارٽي جي چيئرمين بلاول ڀٽو زرداري سڄي ملڪ ۾ پوليس مقابلن تي پابندي جو مطالبو ڪري ڇڏيو، بلاول ڀٽو زرداري چيو آهي ته پوليس مقابلن جي مذمت ڪريان ٿو ۽ ڪنهن کي ماري دهشتگردي ختم نه ٿي ڪري سگهجي، جج انصاف کانسواءِ ٻيا سمورا ڪم ڪري رهيا آهن ۽ انهن جو گهڻو ڌيان سياسي معاملن تي آهي، عمران خان انا سبب هميشه اپوزيشن کي ورهائيندو آهي، مال روڊ تي ڪرائوڊ پيپلز پارٽي جو هو. پاڪستان پيپلز پارٽي جي چيئرمين ڪراچي ۾ بلاول هائوس ميڊيا سيل تي پريس ڪانفرنس ڪري پارٽي جي ميمبر شپ مهم جي شروعات ڪئي، جڏهن ته ميمبر شپ لاءِ ويب سائيٽ پڻ لانچ ڪئي وئي، ان موقعي تي پيپلز پارٽي جو جنرل سيڪريٽري نيئر حسين بخاري، پ پ سنڌ جو صدر نثار کهڙو، حاجي علي مدد جتڪ، سينيٽر شيري رحمان، مولا بخش چانڊيو، ايم اين اي نفيسا شاهه، صوبائي وزير سيد ناصر شاهه، وقار مهدي ۽ ٻيا اڳواڻ پڻ موجود هئا. بلاول ڀٽو زرداري ان موقعي تي چيو ته اسين ملڪ ۾ ٿيندڙ پوليس مقابلن جي مذمت ڪيون ٿا، عدالتن کان مٿانهن قتلن جي خلاف آهيون، ڪنهن کي ماري دهشتگردي ختم نٿي ڪري سگهجي، رائو انوار کي شفاف جاچ جو حق حاصل آهي، اهڙي ئي ريت ڏوهارين کي به پنهنجي قانوني بچاءَ جي اجازت ڏني وڃي، هن سڄي ملڪ ۾ پوليس مقابلن تي پابندي جو مطالبو ڪيو. سندس چوڻ هو ته اسان پنهنجي ڪوششن سان سڄي صوبي اندر دهشتگردي تي ضابطو آندو آهي، سنڌ ۾ مجموعي طور امن امان جي صورتحال بهتر ٿي آهي، آصف علي زرداري شينهن جو شڪاري آهي، چونڊن کانپوءِ سڀ ڪجهه سامهون اچي ويندو. هن چيو ته اسان ميمبر شپ مهم شروع ڪري ڇڏي آهي، جنهن لاءِ پنهنجي ويب سائيٽ به متعارف ڪرائي وئي آهي. بلاول ڀٽو زرداري ملڪ جي ترقي پسند عوام خاص طور تي نوجوانن ۽ عورتن تي زور ڏنو آهي ته اهي ميمبر شپ فارم ڀري هن نظريي جو حصو بڻجي وڃن، جيڪو پاڪستان کي پرامن، ترقي پسند ۽ خوشحال بڻائڻ لاءِ سرگرم آهي، بلاول ڀٽو زرداري ميمبر شپ جا تفصيل ٻڌائيندي چيو ته ان سلسلي ۾ ڪيمپون قائم ڪرڻ سان گڏ جديد ٽيڪنالاجي پڻ استعمال ڪئي ويندي ۽ گهر گهر وڃي ميمبر شپ مهم هلائي ويندي، پاڪستاني شهري جن جي اڪثريت دهشتگردي ۽ نفرت واري سياست جي خلاف آهي، اهي پارٽي جي ميمبر شپ واري ويب سائيٽ ۽ موبائيل فون تي ايس ايم ايس ذريعي به ميمبر شپ حاصل ڪري سگهن ٿا، هن چيو ته ميمبر شپ کي ائين بڻايو وڃي جو ڪارڪنن ۽ منهنجي وچ ۾ ڪا دوري نه هجي، بلاول ڀٽو زرداري چيو ته ميمبر شپ مڪمل ٿيڻ کانپوءِ جديد ٽيڪنالاجي ذريعي ڪارڪنن ۽ ميمبرن سان سڌو رابطو ڪيو ويندو، بلاول ڀٽو زرداري چيو ته پيپلز پارٽي وفاق ۾ بينظير انڪم سپورٽ پروگرام جي شروعات ڪئي، جڏهن ته سنڌ حڪومت غربت جي خاتمي لاءِ يوسي سطح تي ٻهراڙي جي ماڻهن کي بنا وياج جي قرض فراهم ڪري رهي آهي، جنهن سان صوبي جي 6 لک خاندانن کي غربت مان ڇوٽڪارو حاصل ٿيو آهي، انتهاپسندي جي خاتمي ۽ جمهوريت جي مضبوطي لاءِ ارڙهين ترميم آندي، اختيار هيٺين سطح تي منتقل ڪيا ويا ۽ اين ايف سي ايوارڊ ڏنو ويو، هڪ سوال جي جواب ۾ بلاول ڀٽو زرداري چيو ته سينيٽ جون چونڊون مقرر وقت تي ٿينديون ۽ انهن ۾ نواز شريف کي شڪست نصيب ٿيندي. ٻئي پاسي سماجي رابطن واري ويب سائيٽ ٽوئيٽر تي پنهنجي هڪ ٽوئيٽ ۾ پيپلز پارٽي جي چيئرمين بلاول ڀٽو زرداري چيو ته جج انصاف کانسواءِ ٻيا سمورا ڪم ڪري رهيا آهن ۽ انهن جو گهڻو ڌيان سياسي معاملن تي آهي. بلاول ڀٽو زرداري جو چوڻ هو ته چيف جسٽس جي سربراهي ۾ لا ريفارمز ڪميشن قائم آهي ۽ چئني صوبن جا چيف جسٽس ان ڪميشن جا ميمبر آهن، قانون مطابق ڪميشن کي سال ۾ 4 اجلاس ڪرڻا هوندا آهن پر 2015ع کان هن مهل تائين لا ريفارمز ڪميشن جو ڪو به اجلاس نه ٿيو آهي. هن چيو ته جج انصاف کانسواءِ سمورا ٻيا ڪم ڪري رهيا آهن بلڪ انهن جو گهڻو ڌيان سياسي معاملن تي آهي ۽ جج صاحبن جي پنهنجي ڪم کانسواءِ ٻين ڪمن تي ڌيان جي ڪري انصاف متاثر ٿي رهيو آهي.