PrintClose

راولپنڊي (م ڊ) عوامي مسلم ليگ جي سربراهه شيخ رشيد چيو آهي ته (ن) ليگ جو جسٽس آصف سعيد کوسا خلاف قدم سپريم ڪورٽ تي حملي جي برابر آهي. قومي اسيمبلي جو اسپيڪر اياز صادق نظام کي تباهه ڪري رهيو آهي. مسلم ليگ (ن) آئين ۽ قانون خلاف کليل بغاوت ڪري ڇڏي آهي. اياز صادق طرفان پاناما ڪيس جي سربراهي ڪندڙ جج جسٽس آصف سعيد کوسا خلاف اياز صادق طرفان ريفرنس داخل ڪرڻ تي ردعمل ڏيندي شيخ رشيد چيو ته مسلم ليگ (ن) آئين ۽ قانون خلاف کلي سامهون اچي وئي آهي ۽ هنن هاڻي بغاوت ڪري ڇڏي آهي. سندس چوڻ هو ته اياز صادق جو اهو قدم عدليه تي حملي جي برابر آهي ۽ (ن) ليگ کي اهو حملو ان وقت ياد ايندو آهي، جڏهن ڳالهه سندن ڳچي ۾ پوندي آهي. هن چيو ته مسلم ليگ (ن) علي بابا چاليهه چور آهن ۽ هاڻ هي نيب ريفرنسز کان ڀڄي رهيا آهن. هي عوامي طاقت سان سپريم ڪورٽ تي دٻاءُ وجهڻ چاهين ٿا. سندس چوڻ هو ته مسلم ليگ ٽٽڻ طرف وڃي رهي آهي ۽ شريف خاندان حديبيه ڪيس مان بچڻ چاهي ٿو پر ائين نه ٿيندو. هن چيو ته ملڪ جون حالتون خراب ٿيڻ ڏانهن وڃي رهيون آهن، جنهن جو ذميوار نااهل شخص هوندو، حدبيه پيپر ملز ۾ نواز شريف جو سياسي موت ٿيندو، اهو ڪيس شريف خاندان جي سياست ۾ آخري ڪوڪو ثابت ٿيندو، هن چيو ته نواز شريف چاهي ٿو ته ڪا ملڪي يا غير ملڪي طاقت اين آر او ڪرائي پر اين آر او نه ٿيندو، شريف خاندان عدليا سان ٽڪراءُ جو فيصلو ڪري ورتو آهي، حالتون خراب ٿيون ته ذميوار نااهل وزيراعظم هوندو، هن چيو ته جسٽس آصف سعيد کوسا 20 ڪروڙ عوام جو ترجمان آهي، عدليا جي حق ۾ تحريڪ هلائيندس.