PrintClose

ڪراچي (اسٽاف رپورٽر) ڪراچي ۾ دهشتگردن جي هٿان 4 پوليس اهلڪارن جي قتل جو ڪيس داخل ڪيو ويو آهي، اهلڪارن جو قتل ڪيس انسپيڪٽر اشرف مغل جي فرياد تي داخل ڪيو ويو آهي، جنهن ۾ دهشتگردي جو شقون پڻ شامل ڪيون ويون آهن، ٻئي طرف حملي ۾ شهيد ٿيل پوليس اهلڪارن جي جنازي نماز ادا ڪئي وئي، جنازي نماز ۾ ڊي جي رينجرز، آءِ جي سنڌ اي ڊي خواجا ۽ صوبائي وزير منظور وساڻ سميت ڪيترن ئي آفيسرن شرڪت ڪئي، واقعي جا سي سي ٽي وي فوٽيجز به ملي ويا آهن، فوٽيجز ۾ هيلمٽ پهريل دهشتگردن کي فائرنگ ڪندي ۽ ڀڄندي ڏيکاريو ويو آهي پر سندن سڃاڻپ نه ٿي سگهي آهي، ٻئي طرف پوليس واقعي ۾ ملوث هجڻ جي شڪ ۾ ڪيترن ئي ماڻهن کي گرفتار ڪري ورتو آهي، ذريعن موجب پوليس ۽ سي ٽي ڊي ٽيم جوابدارن جي گرفتاري لاءِ اورنگي ٽائون، بلديا ٽائون، مهاجر ڪئمپ، ميٽروول سائٽ، بنارس ۽ شير شاهه جي علائقن ۾ ڇاپا هڻي ڪري ڪيترن ئي شڪي ماڻهن کي حراست ۾ ورتو، پوليس حراست ۾ ورتل ماڻهن کان جاچ ڪري رهي آهي ۽ شاهدن جي مدد سان جوابدارن جي سڃاڻپ جو عمل جاري آهي، پوليس جيل مان آزاد ٿيل ڪالعدم تنظيم ۽ جرائم پيشا ماڻهن سان تعلق رکڻ وارن ماڻهن جو رڪارڊ طلب ڪري ورتو.