PrintClose

فيصل آباد (م ڊ) مسلم ليگ ن ڏچي ۾ اچي وئي آهي، ناراض اسيمبلي ميمبرن استعيفائن جون قطارون لڳائي ڇڏيون آهن، ڪالهه فيصل آباد ۾ ختم نبوت صه ڪانفرنس ۾ ن ليگ جي 2 ايم اين ايز ۽ ٽن ايم پي ايز استعيفائون ڏيڻ جو اعلان ڪندي پنهنجي سياست جا اختيار پير حميد الدين سيالوي حوالي ڪري ڇڏيا آهن، رپورٽ موجب ڪالهه فيصل آباد جي ڌوٻي گهاٽ گرائونڊ ۾ پير حميد الدين سيالوي جي صدارت هيٺ ختم نبوت صه ڪانفرنس ٿي، جنهن ۾ ن ليگ جي ناراض ميمبرن به وڏي انگ ۾ شرڪت ڪئي، ڪانفرنس دوران ايم اين اي ڊاڪٽر نثار جٽ ۽ ايم اين اي غلام بي بي ڀروانه قومي اسيمبلي جي ميمبرشپ تان استعيفيٰ ڏيڻ جو اعلان ڪيو، اهڙي طرح ايم پي اي نظام الدين سيالوي، ايم پي اي مولانا رحمت الله ۽ ايم پي اي محمد خان بلوچ به صوبائي اسيمبلي ميمبرشپ تان استعيفيٰ ڏيڻ جو اعلان ڪيو آهي، استعيفائون ڏيندڙ ميمبرن سيال شريف درگاهه جي پير ۽ تحريڪ لبيڪ جي اڳواڻ پير حميد الدين سيالوي کي پنهنجون استعيفائون پيش ڪندي چيو ته ختم نبوت صه تي جان قربان آهي، اسين مطالبو ڪريون ٿا ته شهباز شريف ۽ راڻا ثناءُ الله فوري طور تي استعيفائون ڏين، جيڪڏهن انهن استعيفائون نه ڏنيون ته ٻيا اسيمبلي ميمبر به استعيفائون نه ڏيندا، ڪانفرنس کي خطاب ڪندي پير حميد الدين سيالوي چيو ته سياست نه پيا ڪريون، نه وري ووٽ وٺڻ آيو آهيان.