PrintClose

لاهور (م ڊ) ريلوي واري وزير خواجا سعد رفيق چيو آهي ته پاڪستان مڪمل طور تي آزاد ملڪ ناهي ۽ ان کي آزاد ملڪ ڏسڻ چاهيون ٿا، لاهور ۾ ”باب پاڪستان“ جي نئين تعمير جي تقريب کي خطاب ڪندي خواجا سعد رفيق جو چوڻ هو ته ڪهڙو اهڙو حملو آهي جيڪو نواز ليگ تي ناهي ڪيو ويو پر وزيراعظم هائوس ۾ ويٺل نواز شريف ايترو خطرناڪ نه هو، جيترو جاتي امرا ۾ ويٺل خطرناڪ آهي، هن چيو ته اسين وڙهڻ ۽ ادارن سان جهيڙو نٿا چاهيون پر اسان اڄ تائين سبق ناهي سکيو، جيڪڏهن ادارا پاڻ ۾ وڙهندا ته ملڪ اڳتي نه هلندو، هن چيو ته پاڪستان مڪمل طور تي آزاد ملڪ ناهي، ان کي آزاد ملڪ ڏسڻ چاهيون ٿا ۽ مڪمل آزادي گهرجي، ائين ملڪ نه هلندو، هن چيو ته اسان جي ڳالهين کي حملو تصور نه ڪيو وڃي ۽ اسان جي مشورن کي غير ذميواراڻو نه سمجهيو وڃي، هن چيو ته هڪٻئي سان جهيڙو ۽ مقابلو ناهي، ووٽ جو احترام چاهيون ٿا ۽ هاڻي فيصلو عوام جو هلندو، بند ڪمري جو نه هلندو، هن چيو ته اسان جي بس کي ”جنگلا“ بس چوڻ وارا هاڻي ڪي پي ڪي ۾ بس هلائڻ وارا آهن ۽ ميٽرو ٽرين جو منصوبو 22 مهينا دير سان شروع ٿيو پر جيڪا به مرضي ڪري وٺو شهباز شريف ٽرين هلائي ڏيکاريندو، هن چيو ته اسان سڀاڻي به چونداسين ۽ ان جي ٻئي ڏينهن به چونداسين ته اسان کي انصاف گهرجي پر هاڻي جلسن ۾ ماڻهو يڪجهتي ۽ محبت جو اظهار ڪن ٿا، هن چيو ته سياست بچي نه بچي ملڪ اهڙي ريت نه هلندو ۽ سياست بچي ٿي يا نه پر سچ ڳالهائڻ کان نه ڪيٻائينداسين.