PrintClose

ڪراچي/ملير (اسٽاف رپورٽر/م ڊ) بن قاسم ٽائون ٿاڻي جي حد پپري عيدو ڳوٺ ۾ مدرسي جي معلم جي مبينا تشدد ۾ معصوم کٿابي قتل ٿي ويو، تفصيل موجب پپري جي عيدو ڳوٺ ۾ واقع مدرسي ۾ پڙهندڙ 9 ورهين جي کٿابي محمد حسين ولد محمد سليم سيپارو پڙهڻ دوران چڪون ڪيون، جنهن تي معلم قاري نجم الدين مبينا طور کٿابي کي لتن، مڪن ۽ ڏنڊن سان تشدد ڪري قتل ڪري ڇڏيو، کٿابي جي قتل جو اطلاع ملندي ئي علائقي واسي گڏ ٿي ويا، جن مدرسي کي گهيري ۾ آڻي ورتو، پوليس پهچي مدرسي جي معلم کي گرفتار ڪري ورتو، جڏهن ته کٿابي جو لاش وارثن حوالي ڪري ڇڏيو. ايس ايڇ او بن قاسم ڌڻي بخش مري صحافين کي ٻڌايو ته مولوي نجم الدين کٿابي تي تشدد ڪيو، اسان پهتاسين ته وارثن نه رڳو لاش اسپتال نيئڻ کان انڪار ڪيو پر مولوي خلاف ڪيس داخل ڪرڻ کان به انڪار ڪري ڇڏيو، مولوي گرفتاري بعد پوليس جي مدعيت ۾ قتل خطا جو ڪيس داخل ڪيو ويو آهي، هوڏانهن ٿاڻي ۾ قيد مولوي نجم الدين صحافين کي ٻڌايو ته کٿابي محمد حسين ولد محمد سليم گذريل ٽن سالن کان پڙهڻ ايندو هو، آچر ڏهاڙي موڪل هجڻ سبب صبح جو 11 وڳي سندس والده وٺي آئي ۽ چيائين ته مون کيس مار ڪڍي آهي، مٿس سختي ڪري قرآن پڙهايو، هن چيو ته کٿابي جا ننڍا ڀائر به موجود هئا، سبق نه پڙهڻ ۽ بار بار مدرسي اٿي وڃڻ تي مٿس ڪاوڙ هئي، جنهن تي هن کٿابي کي ڏنڊن سان تشدد ڪيو، دل بيهي وڃڻ ڪري کٿابي فوت ٿي ويو.