PrintClose
19-01-2018

گمبٽ(رپورٽ:نديم اڄڻ) گمبٽ ۾ پ پ اڳواڻ جي بنگلي آڏو گاڏي جي ٽڪر ۾ اڳوڻو ڪائونسلر فوت، لاش روڊ تي رکي ڌرڻو، ان سلسلي ۾ رات دير سان مير محمد اڄڻ دڪان بند ڪري گهر وڃي رهيو هو ته پپري روڊ وٽ نامعلوم گاڏي ٽڪر هڻي کيس ماري وڌو، هوڏانهن صبح جو راهگيرن جي اطلاع تي وارث پهتا، 5 ڀيرا ٿاڻي تي ٻڌائڻ باوجود پوليس نه پهچڻ تي وارثن لاش کڻائي روڊ تي رکي احتجاجي مظاهرو ڪيو ويو، ان موقعي تي منٺار اڄڻ، اڪبر اڄڻ، سعيد، محبوب اڄڻ ۽ ٻين چيو ته مير محمد جي ڪنهن سان به دشمني نه هئي، سازش تحت کيس قتل ڪري لاش ڦٽو ڪيو ويو آهي، پوليس قاتلن سان ٻٽ بڻيل آهي، هنن چيو ته صبح جو 7 وڳي اطلاع ڏيڻ باوجود 10 وڳي تائين پوليس ناهي پهتي، هنن مطالبو ڪيو ته قاتلن کي گرفتار ڪري سزائون ڏياريون وڃن،هوڏانهن فوتي جو لاش گمبٽ اسپتال مان پوسٽ مارٽم بعد اباڻي قبرستان ۾ تدفين ڪئي وئي، جڏهن ته سوڳ ۾ ڀٽائي چوڪ، ڪسان ڪالوني ۽ فاروقي پاڙي جو ڪاروبار بند رهيو، هوڏانهن پونئيرن سان لطيف شيخ، خالد شيخ، نورالهديٰ شاهه جيلاني، حيدر شاهه، عبدالطيف ناريجي، عارف شيخ، ميانعلي ڏني اڄڻ، محبت خان شنباڻي، واجد علي اڄڻ، شفقت شاهه لڪياري، حسام الدين شاهه، فقير علي شاهه، سرڪار حسين شاهه، صدا حسين شاهه، غلام نبي سيال، غلام رسول پنهور، زاهد پنهور، نديم اڄڻ، الهداد اڄڻ ۽ ٻين تعزيت ڪئي.ٻئي پاسي رات دير سان پوليس سي سي ٽي وي ڪئميرائن جي مدد سان مير محمد اڄڻ کي ٽڪر هڻي ماريندڙ ڪار ۽ جوابدارن جو پتو لڳائي ورتو آهي، پوليس مطابق جنهن ڪار مير محمد اڄڻ کي ٽڪر هنيو ان ۾ بئنڪ مئنيجر منظور منگي جا 2 پٽ سعيد ۽ ماجد منگي سوار هئا ۽ نشي ۾ ڌت هئا، هوڏانهن ذريعن ٻڌايو ته جوابدارن ميونسپل چيئرمين خالد شيخ وٽ ڏوهه جو اعتراف پڻ ڪري ورتو آهي، جڏهن ته پوليس جوابدارن جي چاچي کي گرفتار ڪري ورتو آهي، ٻئي پاسي جوابدارن جي سڃاڻپ ٿيڻ بعد فوتي جا وارث ڪيس داخل ڪرائڻ لاءِ ٿاڻي تي پهتل هئا، آخري اطلاعن تائي ڪيس داخل نه ٿيو هو.