PrintClose

ڪنڊيارو(ن سوڀ) ڪنڊياري ۾ ٻئي جاچ آفيسر به رميش جي موت کي آپگهات قرار ڏئي ڇڏيو، ڇهين ڏينهن به بک هڙتال،ان سلسلي ۾ وارثن جي درخواست تي مقرر ڪيل جاچ آفيسر سعيد جماڻي رميش ڪمار جو موت عشق ۾ ناڪامي تي آپگهات قرار ڏنو، سعيد جماڻي جو چوڻ آهي ته جاچ ملڻ بعد لڳاتار 60 ڪلاڪن تائين ڪيس تي ڪم ڪرڻ رميش جي ذاتي موبائل جي ڊيٽا ڪڍرائڻ، مليل ڊيٽا ۾ استعمال ٿيل موبائل نمبر سميت سموري سي ڊي آر رپورٽ جمع ڪرڻ، آڏي پڇا ۽ گهڻ رخي جاچ بعد ان نتيجي تي پهتو آهيان ته رميش ڪمار پاڻي ۾ ٽپو ڏئي آپگهات ڪيو، جنهن جو سبب عشق ۾ ناڪامي سميت ڪجهه به ٿي سگهي ٿو، هن چيو ته رميش ايس ايم ايس ذريعي پنهنجي سڀ کان گهري رازدار دوست کي اڳواٽ ميسيج وسيلي آپگهات جو اطلاع به ڏنو هو، سندس دوست ميسيجن کي ڀوڳ سمجهيو ۽ معاملو سنجيده ٿيڻ ۽ لاش ملڻ بعد ڊپ سبب پڇا ڪرڻ باوجود هو خاموش رهيو ۽ 15 ڏينهن بعد نيٺ هن ٻڙڪ ٻاهر ڪڍي آهي، جنهن جو اطلاع اسان وٽ اڳ ئي سي ڊي آر رپورٽ ۾ موجود هو، هن چيو ته پنهنجي تجربي ۽ ڪيل جاچ جي بنياد تي اسٽامپ پيپر تي به اهڙي ڳالهه لکي ڏيڻ لاءِ تيار آهيان، ان باوجود اسان هن ڪيس کي بند نه ڪنداسين. هن چيو ته جيڪڏهن ٻيهر پوسٽ مارٽم سميت ڪابه جاچ نئين سنئين ڪرائڻ لاءِ وارثن چيو يا رهجي ويل ۽ وسري ويل شخص کي شامل ڪرڻ لاءِ چيو ته ٻيهر به جاچ ڪنداسين، وارثن جي مطمئن ٿيڻ تائين مڪمل تعاون ڪنداسين، هوڏانهن جدوجهد ڪاميٽي پاران ڇهين ڏينهن به امجد مهيسر، قاري گهانگهري، رمضان خاصخيلي، راڪيش ڪمار، راحب اوڏ، ظفر کوسي، انور سولنگي، هارون ڪلهوڙي، صغريٰ گوپانگ، وقار گوپانگ، سڄڻ پيرزادي، ٿهيم منگي، فرحان کوسي، عمر دراز، دربان شاهه، سهراب کوسي، وسيم گهايل ۽ ٻين علامتي بک هڙتال ڪئي، ان موقعي تي مقتول جي ڀاءُ فوجي راڪيش ڪمار چيو ته پوليس ڪيس جي سمورن رخن کان جاچ ڪرڻ بدران آپگهات جي ڪانٽي تي اٽڪيل آهي، هن چيو ته پوسٽ مارٽم ڪندڙ ڊاڪٽر به ساڳئي ڪانٽي تي اٽڪيا هئا، اسان پاران ڏنل ڪجهه نالن مان سمورن فردن کان جاچ ڪئي وئي آهي يا نه ان متعلق لڪايو پيو وڃي، ڪجهه اهڙا به ماڻهو هئا، جيڪي مرڻي پرڻي ته اسان جي ڪاڄن ۾ ايندڙ هئا پر ڏک جي گهڙي ۾ ناهن آيا، انهن مان هڪ اهڙو به فرد آهي، جنهن اسان جي ڀاءُ رميش ڪمار کي موتمار ڌمڪيون ڏنيون هيون، لاش ملڻ وقت تشدد جا نشان هئا، خبر ناهي ته ڇو ڊاڪٽر ۽ پوليس هڪ ڳالهه تي بيٺل آهن، هن چيو ته آئون به فوجي آهيان، گذارش آهي ته رڪارڊ منهنجي حوالي ڪري مون کي جاچ ڪرڻ ڏني وڃي يا وري جاچ ۾ مون کي ساڻ رکيو وڃي.