PrintClose
20-10-2017

سکر(بيورو چيف) سکر جي مقامي عدالت تڙپي تڙپي فوت ٿي ويل شهري جو ڪيس سول اسپتال جي چئن ڊاڪٽرن سميت 6 ڄڻن خلاف داخل ڪرڻ جو حڪم ڏئي ڇڏيو، ان سلسلي ۾ ففٿ ايڊيشنل سيشن جج جي عدالت نئين پنڊ بدر الدين ڪالونيءَ جي رهواسي محمد فيصل قريشي طرفان داخل ڪرايل درخواست جي ٻڌڻي ڪئي، ٻڌڻيءَ دوران عدالت پٽيشنر جي وڪيل قربان شر جا دليل ٻڌڻ بعد سول اسپتال سکر ۾12 آڪٽوبر تي ڊاڪٽرن جي غفلت سبب فوت ٿي ويل محمد ايوب قريشيءَ جي ايف آءِ آر ڊاڪٽر عبدالسميع ميراڻي، ڊاڪٽر پرمانند، ڊاڪٽر فدا، ڊاڪٽر يوسف، اوٽي ٽيڪنيشن غلام سرور سومرو ۽ فرحان چاچڙ مٿان سي سيڪشن ٿاڻي سکر تي ڪيس داخل ڪرڻ جو حڪم ڏئي ڇڏيو آهي، ان ڏس ۾ پٽيشنر محمد فيصل قريشي جو چوڻ آهي ته سندس چاچي محمد ايوب قريشي جي آنڊي جو آپريشن سکر سول اسپتال جي ڊاڪٽرن 12 آڪٽوبر تي ڪيو هو ، آپريشن غلط ٿيڻ سبب هو تڙپي تڙپي فوت ٿي ويو هو، ڊاڪٽرن جي غفلت ۽ لاپرواهيءَ خلاف عدالت ۾ پٽيشن داخل ڪرائي هئي، جنهن تي گذريل ڏينهن عدالت چئن ڊاڪٽرن سميت 6 ڄڻن مٿان ڪيس داخل ڪرڻ جو حڪم ٻڌايو آهي اميد ته عدالت جوابدارن کي سزا ڏئي انصاف فراهم ڪندي. ٻئي پاسي ڊاڪٽرز ايسوسيئيشن سکر جي صدرڊاڪٽر رفيق ميمڻ ۽ ٻين عدالتي فيصلي کانپوءِ سکر سول اسپتال جي او پي ڊي جو بائيڪاٽ ڪرڻ جو اعلان ڪيو آهي.