PrintClose

جيڪب آباد(رپورٽ؛ رجب علي سومرو) مقتول هندو واپاري جا قاتل گرفتار ڪريو جيڪب آباد ۾ سنڌ بلوچستان سان تعلق رکندڙ سوين هندو برادري جا ماڻهو روڊن تي نڪري آيا، بلوچستان انتظاميه خلاف ڇتي نعريبازي، رپورٽ موجب ٽي ڏينهن اڳ بلوچستان جي ڊيرامراد جمالي ۾ اڻڄاتل هٿياربندن هٿان ڦر دوران مزاحمت تي بيدردي سان قتل ٿي ويل جيڪب آباد واسي هندو نوجوان واپاري 37 ورهين جي ديپڪ ڪمار ولد ڪوڙو مل جي قاتلن جي گرفتاري، سينيٽر هيمن داس جي پٽ وڪي ڪمار جي اغوا ۽ سنڌ بلوچستان ۾ رهندڙ هندو برادري کي ٽارگيٽ ڪري ڦر لٽ واري وڌندڙ وارداتن خلاف جيڪب آباد هندو پنچائت جي سڏ تي بلوچستان جي ڊيرامراد جمالي ، اوستا محمد، ڊيرالهيار کان آيل سوين هندو برادري جي ماڻهن پنچائت جي صدر لال چند سيتلاڻي، ڊاڪٽر رام ڪمار،بلوچستان جي اڳوڻي صوبائي وزير جئه پرڪاش، لڇمڻ داس ڪنگراڻي، سريچند ڀاوناڻي، اشوڪ ڪمار تيجواڻي، گريل داس مکي ماڻڪ مل روشن لال، مکي نارائڻ داس،همٿ ڪماربلوچستان جي ڪرپال داس، خان چند، بنسي ڪمار ڪائونسلر ديوانند، ڊاڪٽر لکميچند ۽ ٻين جي اڳواڻي ۾ جنتا هال کان هڪ وڏي احتجاجي ريلي ڪڍي وئي ريلي ۾ شامل مقتول ديپڪ ڪمار جي سوڳوار ڀاءُ شبن ڪمار مقتول ڀاءُ جي تصوير هٿن ۾ کڻي زاروقطار روئيندو رهيو جنتا هال مان نڪتل ريلي شهر جي مک روڊن تان ٿيندي پريس ڪلب پهتي جتي سوين هندن جو گڏ ٿيل ميڙ هڪ جلسي جي صورت اختيار ڪري ويو، ان موقعي تي مٿين اڳواڻن خطاب ڪندي چيو ته هندو برادري سميت اقليتن کي هتي ڪمزور سمجهي نشانو بڻايو پيو وڃي، ڊيرامراد جمالي وچ شهر اندر هٿياربند سرعام شهر گهمي ڦري اچي ديپڪ ڪمار جي دڪان ۾ داخل ٿي هن کان ڦر لٽ شروع ڪئي هن هٿياربند سان مهاڏو اٽڪايو ته بيدردي سان ماريو ويو ڊيرامراد جمالي پوليس تماشو ڏسندي رهي هنن چيو ته بلوچستان جي سينيٽر هيمن داس جي پٽ کي سرعام اغوا ڪيو ويو آهي، جنهن کي ڏيڍ مهينو ٿيو آهي جيڪو اڃا تائين بازياب نه ٿي سگهيو آهي، هنن چيو ته اسان مٿان ڀل ڪيترا به ظلم ڪيا وڃن، اسان محب وطن آهيون پنهنجي جنم ڀومي نه ڇڏينداسون ڇو ته اهو سڀ ڪجهه اسان کي پنهنجي وطن مان لڏائڻ جي سازش ڪري ملڪيتن تي قبضو ڪرڻ جي سازش سٽي وئي آهي جيڪا ناڪام بڻائي ڏيکارينداسون هنن چيو ته تازو جيڪب آباد ۾ سيٺ سريچند جي دڪان تي ڏاڍن مڙسن چڙهائي ڪري ڀڃ ڊاهه ڪئي، جڏهن ته لڇمڻ داس ڪنگراڻي جي پٽ تي ٿاڻي اندر مارڪٽ ڪري ڪوڙا ڪيس داخل ڪرايا ويا، هنن چيو ته مقتول ديپڪ ڪمار کي قتل ٿئي ٽي ڏينهن ٿي ويا آهن پر افسوس جو بلوچستان جي انتظاميه قاتلن جي گرفتاري ۾ عدم دلچسپي جو مظاهرو ڪري اسان کي مايوس ڪيو آهي هنن چيو ته اسان وٽ ڊي آءِ جي نصير آباد شرجيل کرل ، ڪمشنر نصيرآباد احمد عزيز تارڙ ايس ايس پي ۽ دي سي ڊيرامراد جمالي هلي اچي اها پڪ ڏياري هئي ته اوهان هندو برادري احتجاج نه ڪجو اوهان جي مقتول جا ٽن ڏينهن اندر قاتل گرفتار ڪري سک جو ساهه کڻنداسون اهو ڏنل مدو به گذري ويو ان ڪري اڄ وري روڊن تي نڪري آيا آهيون جيڪڏهن عيد تائين اسان سان انصاف نه ٿيو ته عيد بعد اسان پهرين مرحلي ۾ جيڪب آباد ۽ ديرامراد جمالي، ڇٽر، اوستا محمد ۽ ڊيرا الهيار جا 20 هزار هندو مرد عورتون ۽ معصوم ٻارڙا روڊن تي آڻينداسون هنن آرمي چيف جنرل قمر جاويد باجوا، وزير اعظم نواز شريف، سنڌ ۽ بلوچستان جي وڏن وزيرن ۽ اختيارين کي اپيل ڪندي چيو ته اسان هندو برادري سان ٿيندڙ زيادتين جو نوٽيس وٺي اسان کي انصاف ۽ تحفظ فراهم ڪيو وڃي.