PrintClose
20-10-2017

سڪرنڊ (رپورٽ: عزيز لاکو) سڪرنڊ لڳ ڳوٺ دليل ديرو جي هڪ ئي خاندان جي 6 ڄڻن جي فوت ٿيڻ تي تعزيت ڪرڻ لاءِ ڪمشنر ۽ ڊي سي بينظير آباد سميت پ پ اڳواڻ تڏي تي پهتا. ايم اين اي فريال ٽالپر جي پاران ڏک جو پيغام پهچايو، هر فوتي جي وارث کي 5، 5 لک رپيا سرڪار پاران معاوضو ڏيڻ جي سفارش ڪري ڇڏي، خبر موجب سڪرنڊ تعلقي جي تاريخي ڳوٺ دليل ديرو جي هڪ ئي خاندان جي حادثي ۾ فوت ٿيل 6 ماڻهن جي وارثن کي سنڌ حڪومت پاران في ماڻهو 5 لک رپيا معاوضو ڏيڻ جو اعلان ڪري ڇڏيو. خبر موجب 3 ڏينهن اڳ سيوهڻ ڀرسان ٿيل دردناڪ روڊ حادثي ۾ ڳوٺ دليل ديرو جي هڪ ئي گھر جي فوت ٿيل 6 ماڻهن جي پونيئرن جي سنڀال لاءِ پ پ ايم اين اي فريال ٽالپر جي هدايتن تي في فوتي ماڻهو لاءِ 5 لک رپيا معاوضو ڏيڻ جي لاءِ ڪمشنر بينظير آباد غلام مصطفى ڦل، پ پ ضلعي نوابشاهه جي صدر علي اڪبر جمالي، جنرل سيڪريٽري غلام شاهه لغاري، ايم پي اي طارق مسعود آرائين، ايم پي اي غلام قادر چانڊيو، ڊپٽي ڪمشنر نوابشاهه نعمان صديق، تعليمي ماهر راضي خان جمالي، سيد علي حيدر شاهه، شبير احمد مگسي، اسسٽنٽ ڪمشنر سڪرنڊ سلامت ميمڻ ۽ ٻين تڏي تي پهچي مگسي خاندان جي پونيئرن غلام مصطفى مگسي، مير حسن مگسي ۽ ٻين سان تعزيت جو اظهار ڪيو. واقعي تي ڏک جو اظهار ڪيو. ان موقعي تي ڪمشنر شهيد بينظير آباد غلام مصطفى ڦل اعلان ڪيو ته فوت ٿيل 6هن ئي ماڻهن جي وارثن کي 5، 5 لک رپيا ڏيڻ لاءِ سفارش موڪلي وئي آهي، جيڪا سنڌ حڪومت پاران جلد ادا ڪئي ويندي. هن چيو ته پ پ ايم اين اي فريال ٽالپر ڄاڻايل دردناڪ حادثي تي ڏک جو اظهار ڪيو آهي ۽ سندس هدايتن کي اسين هتي پهتا آهيون. انشاءَ الله ڏکويل ڪٽنب جي هر ممڪن مدد ڪئي ويندي. ٻئي طرف پ پ تعلقي سڪرنڊ جي اڳواڻ حاجي الهه بخش لاکو، نور احمد لاکو، امتياز راهو، سينيئر صحافي عاجز جمالي، ميڊيا سينٽر سڪرنڊ جي صدر قربان عمراڻي، اعظم راول، عزيز لاکو ۽ ٻين تڏي تي پهچي پوئيرن سان تعزيت ڪئي، هوڏانهن سنڌ يونائيٽيڊ پارٽي جي سينيئر نائب صدر سيد زين شاهه ڳوٺ دليل ديرو پهچي سيوهڻ لڳ حادثي ۾ فوت ٿي ويل 6 ڄڻن جي وارثن سان تعزيت جو اظهار ڪيو، ٻئي طرف جسقم اڳواڻ ڊاڪٽر نياز ڪالاڻي، آصف مگسي، ساگر حنيف بڙدي، جي ايم سنڌي، مسعود شاهه، عالم ڪيريو، قاسم سومرو ۽ مظفر ملاح پهچي حادثي ۾ فوت ٿيلن جي وارثن سان تعزيت ڪئي، ان موقعي تي جسقم اڳواڻ ڊاڪٽر نياز ڪالاڻي ۽ آصف مگسي پاران واقعي کي سانحو قرار ڏيندي اعليٰ عدليه کان مطالبو ڪيو ته حڪومت پاران مگسي برادري جي متاثر غريب خاندان کي مالي معاوضو ڏنو وڃي.