PrintClose

لاڙڪاڻو (رپورٽ: اياز ساريو) لاڙڪاڻي ۾ ڪيس پراپرٽي طور بيٺل ڪار استعمال ڪرڻ تي ايس ايڇ او ۽ وڏي منشي کي هٿڪڙيون، لاڪ اپ حوالي، ڌامراهه ٿاڻي تي هلندڙ سال دوران تيل چوري ڪرڻ واري ارادي جي ڪيس ۾ پراپرٽي طور بيٺل ڪار ۾ ايس ايڇ او گذريل ڏينهن پنهنجي اسٽاف سميت جيئن ئي حاضري لاءِ عدالت ۾ پهتو ته تيل چوري ڪرڻ جي الزام ۾ گرفتار ٿيل گاڏي جي مالڪ جوابدار پرويز پٺاڻ پنهنجي وڪيل آصف علي چانڊيو معرفت سيشن جج کي شڪايت ڪئي ته پوليس جي تحويل ۾ بيٺل اسان جي گاڏي ايس ايڇ او استعمال ڪري رهيو آهي، جنهن کانپوءِ سيشن جج عبدالغفور ڪلهوڙو معاملي جو سخت نوٽيس وٺندي پاڻ عدالت کان ٻاهر اچي گاڏي ڏٺي ۽ بعد ۾ ايس ايڇ او ممتاز راهوجي کي طلب ڪري ورتو، عدالت گاڏي کي پنهنجي ڪسٽڊي ۾ وٺي ايس ايڇ او ممتاز راهوجو ۽ وڏي منشي علي حسن انڙ کي هٿڪڙيون هڻائي لاڪ اپ حوالي ڪري ڇڏيو ۽ حڪم ڪيو ته گرفتار ٿيلن مٿان ڪيس داخل ڪيو وڃي ۽ وڌيڪ جاچ ڪئي وڃي ته گاڏي جوابدارن جي آهي يا نه. جنهن بعد وڌيڪ ڪارروائي لاءِ سيشن جج جڊيشل مئجسٽريٽ ٿري ڏانهن جاچ منتقل ڪري ڇڏي آهي. اطلاع آهن ته ڪار واري معاملي کان پوءِ اي ايس پي پڻ عدالت ۾ پهتو هو پر ايس ايڇ او کي پوءِ به گرفتار ڪرڻ جو حڪم ڏنو ويو. ان سلسلي ۾ سول لائين ٿاڻي جي ايس ايڇ او نور مصطفيٰ پٺاڻ چيو ته عدالت جي حڪم تي ايس ايڇ او ڌامراهه ۽ وڏي منشي کي گرفتار ڪري لاڪ اپ حوالي ڪري ڇڏيو آهي، سندن مٿان سرڪاري پراپرٽي استعمال ڪرڻ جو ڪيس داخل ڪري وڌيڪ جاچ ڪرڻ جو حڪم ڏنو ويو آهي ته گاڏي جوابدارن جي آهي يا نه؟ گرفتار ٿيل ايس ايڇ او ٻڌايو ته مان گاڏي استعمال نه ڪندو آهيان، گاڏي سرڪاري پراپرٽي هئي ۽ اها لاڙڪاڻي عدالت ڏانهن جمع ڪرائڻ لاءِ ڪاهي آيو هيس، مان بيگناهه آهيان. وڏي منشي ٻڌايو ته منهنجو ڪو به ڏوهه نه آهي، نه ئي مون گاڏي استعمال ڪئي آهي، مون کي بيگناهه لاڪ اپ ڪيو ويو آهي.