PrintClose

گهوٽڪي (ڊ ر) گهوٽڪي جي ڊسٽرڪٽ جيل ۾ قيدين انتظاميا تي تشدد ڪرڻ جو الزام هنيو آهي، ان سلسلي ۾ جيل انتظاميا پاران ڪيسن جي ٻڌڻي جي سلسلي ۾ قيدين کي عدالت ٻاهران ٺاهيل سب جيل ۾ آندو ويو، جتي قيدين احتجاج شروع ڪندي جيل انتظاميا خلاف نعريبازي ڪئي، ان موقعي تي قيدي نادر کوسي، حسين بخش ماڇي، مير خان کوسي ۽ ٻين ٻڌايو ته جيل اندر هڪ هفتي کان تشدد شروع ڪيو ويو آهي، جيل سپرنٽينڊنٽ انور مصطفيٰ، هزارو لنجار ۽ جيلر منظور شاهه جيل اندر قيدي رياض پٺاڻ، اختر جوڻو ۽ امام بخش پتافي ذريعي ڀتو وٺن ٿا ۽ ڀتو نه ڏيندڙ قيدي کي ڄاڻايل ماڻهو تشدد ڪن ٿا، هنن چيو ته اسان جي ماني بند ڪئي وئي آهي، جيل ۾ اسان جي ملاقات به نٿي ڪرائي وڃي، هوڏانهن احتجاج جي ٻن ڪلاڪن کانپوءِ قيدي ڪيسن جي حاضري مڪمل ٿيڻ بعد عدالت ٻاهران ويٺل ئي هئا ته جهيڙو ٿي پيو، جنهن دوران هڪٻئي کي قينچون هڻڻ سبب 2 قيدي رياض الله پٺاڻ ۽ نادر کوسو زخمي ٿي پيا، جن کي زخمي حالت ۾ ئي ڊسٽرڪٽ جيل منتقل ڪيو ويو، ايس ايڇ او اي سيڪشن عباس ٻڌايو ته قيدين جي جهيڙي جي ايف آءِ آر داخل ڪئي ويندي، زخمي قيدين کي ليٽر لاءِ ڊسٽرڪٽ جيل منتقل ڪيو ويو آهي، هوڏانهن ڊسٽرڪٽ جيل جي سپرنٽينڊنٽ انور مصطفيٰ رابطو ڪرڻ تي ٻڌايو ته قيدي نادر کوسو ۽ رياض الله پٺاڻ قتل جي ڪيسن ۾ سزا ڀوڳي رهيا آهن، جن جو 2 ڏينهن اڳ جيل اندر جهيڙو ٿيو هو، جهيڙي ٿيڻ بعد قانون تحت بند وارڊ ڪرڻ بدران رعايت ڏيندي رڳو سندن باريڪون تبديل ڪيون ويون.