آچر 27 مئي 2018ع

پهريون ون ڊي: نيوزلينڊ پاڪستان کي 61 رنسن تان هارائي ڇڏيو

ويب ڊيسڪ: ويلنگٽن: نيوزيلينڊ پاڪستان کي پهرين ون ڊي ميچ ۾ ڊڪ ورٿ لوئيس ميٿڊ تحت 61 رنسن تائين شڪست ڏئي ڇڏي آهي. رپورٽ مطابق ٽاس کٽي پاڪستان نيوزيلينڊ کي پهريان بئٽنگ ڪرڻ جي دعوت ڏني جنهن تي ڪيويز پاڪستان کي 316 رنسن جو ٽارگيٽ ڏنو جنهن جي جواب ۾ گرين شرٽس جي بئٽنگ لائين ڏکيائين جو شڪار نظر آئي ۽ ڪيويز بالرز جي سامهون پاڪستاني بئٽسمينن جا هٿ ڏڪڻ لڳا ۽ اهڙي طرح پاڪستان جي ٽيم 6 وڪيٽن جي نقصان تي رڳو 166 رنسون ٺاهي سگهي هئي جو برسات جي ڪري ميچ روڪي وئي. ڊڪ ورٿ لوئي ميٿڊ تحت نيوزيلينڊ پاڪستان کان اڳتي هو ۽ برسات نه رڪجڻ سبب مقرر وقت تي ميچ شروع نه ٿيڻ ڪري نيوزيلينڊ کي ميچ جو فاتح قرار ڏنو ويو. ان کان اڳ نيوزيلينڊ بئٽنگ ڪندي 315 رنسون ٺاهيون جنهن ۾ ڪپتان ڪين وليم سن 115، ڪولن منرو 58، مارڪ نڪولس ففٽي ۽ مارٽن گپٽل 48 رنسون ٺاهيون. پاڪستان طرفان حسن علي 3 جڏهن ته عامر، فخر زمان، رومان رئيس ۽ فهيم اشرف هڪ هڪ رانديگر کي آئوٽ ڪيو. بعد ۾ پاڪستان اننگز شروع ڪئي ته ڪنهن به پاڪستاني بئٽسمين ٻوٽو ٻاري نه سگهيو ۽ اهي هڪ ٻئي پٺيان آئوٽ ٿيندا ويا.