آچر 27 مئي 2018ع

انسانيت کي لڄائيندڙ قصور واقعو

ايڊيٽوريل
پنجاب جي ضلعي قصور ۾ 7 ورهين جي معصوم نياڻي زينب کي لڄالٽ جو نشانو بڻائڻ بعد قتل ڪرڻ جهڙو انتهائي افسوسناڪ ۽ انسانيت کي لڄائيندڙ واقعو پيش آيو آهي، اهڙي واقعي سڄي ملڪ جي ذي شعور ماڻهن جي ضميرن کي جنجهوڙي ڇڏيو آهي ته آخر هي معاشرو ڪهڙي بي راهه رويءَ جو شڪار ٿي ويو آهي، جتي هاڻ معصوم گلن جهڙين نياڻين سان به اهڙا هانءُ ڏاريندڙ واقعا پيش اچڻ معمول بڻجي ويا آهن، قصور واقعي جو سول ۽ عسڪري قيادت سميت عدليا به سختيءَ سان نوٽيس ورتو آهي، جڏهن ته واقعي خلاف قصور جو عوام روڊن تي نڪري آيو ۽ سخت احتجاج ڪيو، اهو احتجاج پرتشدد ۾ تبديل ٿيڻ سبب 2 ڄڻا گولين جو کاڄ پڻ بڻجي ويا، قصور واقعي بعد احتجاج ڪندڙ عوام وقت جي حڪمرانن کان اهو مطالبو ڪيو آهي ته انسانيت کي لڄائيندڙ اهڙي واقعي ۾ ملوث درندن کي قانون جي پڪڙ ۾ آڻي عبرت جو نشان بڻايو وڃي، پنجاب چائلڊ رائٽس پروٽيڪشن جي هڪ ڇرڪائيندڙ رپورٽ مطابق سال 2015ع ۾ قصور اسڪينڊل کي ملائي ڪري 451 ڪيس صرف قصور ۾ رپورٽ ٿيا، جڏهن ته سال 2016ع ۾ قصور اندر اهڙا واقعا گهٽجي 141 پيش آيا هئا ۽ اهڙي طرح گذيل سال 2017ع ۾ قصور اندر ٻارڙن سان جنسي زيادتي جا 129 واقعا پيش آيا، اهڙا واقعا يقيني طور تي هن ملڪ ۽ سماج لاءِ بدنامي جو باعث بڻيل آهن، ڏٺو وڃي ته ٻارڙن سان جنسي زيادتي جا اهڙا واقعا سنڌ ۾ به پيش اچن ٿا، بلوچستان ۽ ڪي پي ڪي ۾ به اهڙا واقعا رپورٽ ٿين ٿا، ڏٺو وڃي ته ملڪ اندر معصوم نياڻين سان ظلم ۽ زيادتين جا اهڙا ته شرمناڪ ۽ افسوسناڪ واقعا پيش آيا آهن، جن انسانيت جا ليڪائي لتاڙي ڇڏيا آهن، ملڪ ۾ معصوم نياڻين جون عصمتون وحشي درندن جي هٿان پائمال ٿي رهيون آهن، بي آبرو بڻيل انهن مظلوم عورتن ۽ معصوم نياڻين لاءِ هاڻ ڄڻ ته هي معاشرو اذيتن، دردن ۽ پيڙائن جي گهٽ ۽ ٻوسٽ جهڙو مصيبتن جو زندان گهر بڻجي ويو آهي. ڇا اسان اهڙي معاشري کي هڪ مهذب ۽ سڌريل معاشري جو درجو ڏئي سگهون ٿا، جنهن ۾ هر ڏينهن اهڙن شرمناڪ واقعن جو پيش اچڻ ۽ وحشي درندن جو راڄ قائم ٿيل هجي، اهڙن واقعن جي روڪٿام توڙي درندن خلاف حڪومت جي رٽ حرڪت ۾ نه اچڻ واري حڪومتي عمل ته ويتر هن معاشري کي سماجي براين ڏانهن ڌڪي ڇڏيو آهي. معصوم نياڻين جي عصمتن کي ڇيها رسائڻ جهڙا واقعا هاڻ ته سنڌ سميت ملڪ ۾ معمول بڻجڻ واري حد کان وڌيڪ خطرناڪ صورتحال جهڙي شڪل اختيار ڪري چڪا آهن. پنجاب ۾ ته معصوم نياڻين سان ظلم ۽ زيادتين جا واقعا وڌي رهيا آهن پر افسوس آهي جو قانون جي رٽ سواليه نشان بڻيل آهي، اهڙن واقعن ۾ ملوث وحشي سفاڪ جوابدارن کي ڪيفر ڪردار تائين پهچائڻ ۽ مظلوم نياڻين کي انصاف فراهم ڪرڻ جي لاءِ قانون جي رٽ حرڪت ۾ نظر نٿي اچي، عوامي مينڊيٽ ملڻ جي باوجود انساني حقن جي تحفظ، سماجي براين جي خاتمي، بگاڙيل سماج ۾ سڌارا آڻڻ، معصوم نياڻين جي عصمتن کي تحفظ فراهم ڪرڻ لاءِ حڪمران اهڙن واقعن جي روڪٿام ۽ قانون جي عملداري کي يقيني بنائڻ لاءِ عملي طرح ڪو به ڪردار اد ا ڪندي نظر نٿا اچن. اسان سمجهون ٿا ته قصور واقعو انسانيت کي لڄائيندڙ ۽ شرم وچان ڪنڌ جهڪائيندڙ افسوسناڪ واقعو آهي، اهڙي واقعي ۾ ملوث انسانن جي روپ ۾ ڪي وحشي درنده ئي آهن، جن کي نه رڳو قانون جي پڪڙ ۾ آندو وڃي، بلڪي اهڙن وحشين کي اهڙي ته عبرتناڪ سزا ڏياري وڃي جو ڪو به معصوم نياڻين ڏانهن ميري اک نه کڻي سگهي، ان لاءِ وفاقي ۽ صوبائي حڪومتن کي گهرجي ته اهي معصوم ٻارڙن جي حقن ۽ تحفظ لاءِ لاڳو ڪيل قانونن تي سختيءَ سان عملدرآمد ڪرائي، ملڪ اندر معصوم نياڻين جي تحفظ کي يقيني بڻائن.