آچر 27 مئي 2018ع

هڪ آمريڪي ايئربيس تي موجود جاسوس جهاز جي تصوير انٽرنيٽ تي وائرل ٿي وئي

ويب ڊيسڪ: نيويارڪ: هڪ آمريڪي ايئربيس تي موجود جاسوس جهاز جي تصوير انٽرنيٽ تي وائرل ٿي وئي آهي جنهن بابت دعويٰ ڪئي پئي وڃي ته اهو دنيا جو سڀ کان تيز رفتار آمريڪي خفيه جهاز آهي جيڪو 7 هزار 4 سو ڪلوميٽر في ڪلاڪ جي رفتار سان اڏامي سگهي ٿو. هڪ مشهور برطانوي ويب سائيٽ تي شايع ٿيل رپورٽ مطابق آمريڪي فوج طرفان خفيه طور تي تيار ڪيل هڪ اهڙي جنگي جهاز جي تصوير منظر عام تي اچي وئي آهي جيڪو 7400 ڪلوميٽر في ڪلاڪ جي رفتار سان اڏامي سگهي ٿو ۽ امڪاني طور تي هن وقت دنيا جو سڀ کان تيز رفتار جهاز به اهو ئي آهي. اها تصوير گوگل ارٿ ذريعي منظرعام تي آئي آهي جنهن ۾ گوگل سيٽلائيٽ ذريعي آمريڪي رياست فلوريڊا جي هڪ ايئربيس جي تصوير حاصل ڪئي آهي جنهن ۾ ڏسي سگهجي ٿو ته ايئربيس تي هڪ ٽڪنڊي شڪل وارو جهاز موجود آهي. ويب سائيٽ دعويٰ ڪئي آهي ته تصوير ۾ نظر ايندڙ جهاز آمريڪي ايئرفورس جو سڀ کان تيز ترين اڏام ڪندڙ هائپر سانڪ پلين آهي جنهن کي هن مهل تائين خفيه رکيو پيو وڃي ۽ ان جي اڏام کي ڪجهه ماڻهو اڏام کٽولي جي اڏام سان به ڀيٽين پيا. رپورٽ مطابق اهو خفيه هائپر سانڪ جهاز دنيا جي سڀ کان وڏي جهاز ٺاهيندڙ ڪمپني لاڪ هيڊ مارٽن تيار ڪيو آهي، جنهن کي تيار ڪرڻ جو پراجيڪٽ سال 2000ع ۾ شروع ٿيو هو.