آچر 18 نومبر 2018ء

غربت کي گهٽائڻ لاءِ پاليسيون ڪٿي آهن؟

غلام شبير ابڙو
ملڪ جي سياسي افق تي ڪرپشن جي زلزلي جي جھٽڪن ڪاروباري سياستدانن جي ملڪ اندر ۽ ٻاهر آمدني کان وڌيڪ گڏ ڪيل ملڪيتن ملڪ کي لوڏي ڇڏيو آهي، ڪيترن ئي ڏهاڪن کان لوھه جو ڪاروبار ڪندڙ شريف خاندان هڪ ئي وقت ۾ سياست ۽ ذاتي ڪاروبار گڏ هلائيندا رهيو آهي، ان حوالي سان ( ن ليگ ) جي سينيئر اڳواڻ ۽ اڳوڻي وفاقي گھرو وزير چوڌري نثار پنهنجي بيان ۾ چيو آهي ته مون نواز شريف کي ذاتي طور تي گھڻو سمجھايو ته هاڻي سياست ڪيو يا ذاتي ڪاروبار ڪيو پر نواز شريف منهنجي هڪ به نه ٻڌي، تنهن ڪري اڄ ان کي اهڙا ڏينهن ڏسڻا پيا آهن. مطلب ته هن ٻه گدرا هڪ مٺ ۾ کنيا ۽ هاڻي ان لاءِ ٻئي گدرا بچائڻ تمام ڏکيو پئجي ويو آهي پر اڃا به هو ذاتي ڪاروبار ۽ سياست کي گڏ هلائڻ تي بضد آهي. ٿي سگهي ٿو ته اهي ٻئي گدرا ان جي مٺ مان نڪري وڃن. نواز شريف پاران پاڪستان جي ڀلائي، خوشحالي ۽ پاڪستان جي ادارن ۽ معيشت کي مستحڪم بڻائڻ بدران پنهنجي خاندان ۽ پنهنجي ويجهن عزيزن لاِءِ مختلف ملڪن ۾ ذاتي ڪاروبار لاءِ منتقل ڪري سيڙپ ڪيل پئسا آخر ڪار نواز شريف ۽ ان جي خاندان لاءِ زوال جو سبب بڻجي رهيا آهن. پاڪستان جي سياست ۾ سڀ کان پهريون ڪاروباري خاندان نواز شريف جو هو، جنهن هڪ ئي وقت ذاتي ڪاروبار ۽ سياست گڏ هلائڻ جو رجحان پيدا ڪيو.ڪرپشن سبب پاڪستان جا ادارا تباھ ٿيڻ لڳا، ريلوي، پي آ ئي اي ۽ اسٽيل مل خساري ۾ پئجي ويا. 2008 ع تائين عالمي بينڪ جو قرض في فرد جي حساب سان 35 هزار رپين تائين هو پر بعد ۾ 1 لک 20 هزار رپين جو قرضي ٿي ويو، انهيءَ عرصي دوران هو سڀ ارب ۽ کرب پتي بڻجي ويا پر عوام غريب ٿي ويو. هن وقت پاڪستان جو غريب عوام پنهنجن ٻچن لاءِ ٻن ويلن جي ماني ڳڀي ڪاڻِ پريشان بڻيل آهي. پاناما ليڪس جي انڪشافن کان پوءِ جڏهن لنڊن ۾ نواز شريف جي خاندانن جون آف شور ڪمپنيون هجڻ جا ثبوت ملڻ تي ان کي سڀ کان پهرين پاڻ فراخدلي سان وزير اعظم جي عهدي تان استيفي ڏيڻ کپندي هئي پر هن ائين نه ڪيو ۽ عدالت ذريعي آف شور ڪمپنين جي معاملي مان نڪرڻ پئي چاهيو پر ڪوڙ ڳالهائڻ ۽ جاچ دوران ثبوت نه ڏيڻ تي وزير اعظم جي عهدي تان هٽائڻ سان گڏ کيس نااهل به قرار ڏنو ويو پر عهدي تان لهڻ کان پوءِ اخلاقي طور تي ڏوھ قبول ڪرڻ بدران پاڻ کي بي گناھ قرار ڏيڻ شروع ڪيو، عوامي جلسن ۾ واويلا ڪري اهو ئي چوندو رهيو ته مون کي ڇو هٽايو ويو؟ مون کي ڇو لاٿو ويو ۽ مونکي مليل مينڊيٽ جو احترام ڇو نه ڪيو ويو؟ هاڻي نواز شريف پنهنجي مدد لاءِ ميثاق جمهوريت جو معاهدو ڪندڙ کي معاهدو ياد ڏيارڻ جون ڪوششون ڪري رهيو آهي ۽ غير مشروط طور تي ڳالهائڻ لاءِ تيار آهي پر هاڻي حالتون بدلجي چڪيون آهن. 1999ع ۾ دوست ملڪ وچ ۾ پئي نواز شريف کي پاڻ وٽ گھرايو هو پر هاڻي ساڳيو ملڪ پاڻ ڪرپشن جي خلاف سخت ڪاروائي ڪري رهيو آهي. ضرورت ان ڳالهه جي آهي ته جيڪا حالت هن وقت غريب جي آهي، ان کي سمجهڻ جي ضرورت آهي. انهن جي معاشي حالتن ۾ تبديلي آندي وڃي، مهانگائي جي طوفان کي روڪيو وڃي. بيروزگار نوجوانن کي نوڪريون ڏنيون وڃن، جيڪڏهن کاتن ۾ نوڪريون نه آهن ته گهٽ ۾ گهٽ انهن کي بيروزگاري الائونس ڏنو وڃي. ڇو ته هي به پاڪستان جا شهري آهن ۽ انهن جو به حق آهي. 50 هزار رپيا پگهار کڻندڙ ملازم جي پگهار مان پنج هزار رپيا، هڪ لک رپيا پگهار کڻندڙ ملازم جي پگهار مان 10 هزار رپيا ۽ ٻه لک رپيا پگھار کڻندڙ ملازم جي پگهار مان 20 هزار رپيا ڪٽوتي ڪري بي روزگارن کي وظيفو ڏنو وڃي ۽ پنجن سالن تائين سرڪاري ملازمن جي پگهار ۾ اظافو ڪرڻ بدران نوان بي روزگار ڀرتي ڪيا وڃن ته جيئن عام غريب ۽ بي روزگار پنهنجي ٻچن کي ٻن ويلن جي ماني ڳڀو کارائڻ جي لائق ٿي سگهي. نواز شريف پاران جاري ڪيل صحت ڪارڊ کي غريبن لاءِ روزگار ڪارڊ ۾ تبديل ڪيو وڃي ته جيئن غريب انهن پئسن مان روزگار ڪري سگهي. ان جي بدلي غريبن کي علاج جي سهولت ڏيڻ خاطر سرڪاري اسپتالن ۾ سڌارا آندا وڃن ته عام مسڪين ماڻهو خوش زندگي گذاري سگهي ٿو.