جمعو 17  آگسٽ 2018ع

ٽرمپ روسي مداخلت بابت ڊيموڪريٽ ميمبرن جو ميمو پڌرو ڪرڻ کان روڪي ڇڏيو

ويب ڊيسڪ: واشنگٽن: آمريڪي صدر ڊونلڊ ٽرمپ 2016ع جي چونڊن ۾ روسي مداخلت جي جاچ بابت ڊيموڪريٽ ميمبرن جو تيار ڪيل ميمو پڌرو ڪرڻ کان روڪي ڇڏيو آهي. وائيٽ هائوس جو چوڻ آهي ته ميمو ۾ حساس ۽ خفيه مواد شامل آهي ۽ ان کي پڌرو نه ڪرڻ جي فيصلي جي حوالي سان ايوان نمائندگان جي انٽيليجنس ڪميٽي جي چيئرمين کي خط لکي آگاهه ڪيو ويو آهي. واضح رهي ته ڊونلڊ ٽرمپ تي 2016ع جي آمريڪي صدارتي چونڊن جي مهم جي حوالي سان الزام لڳندا رهيا آهن ته کيس مبينه طور تي روس جي حمايت حاصل هئي جنهن جو مقصد اهو هو ته ٽرمپ جي مخالف اميدوار هليري ڪلنٽن جي ساک کي نقصان پهچايو وڃي، پر انهن الزامن جي روس ۽ آمريڪي صدر ٽرمپ طرفان ترديد ڪئي وئي هئي. تازو ئي آمريڪي ايوان نمائندگان جي انٽيليجنس ڪميٽي ريپبلڪن ميمبرن جي تيار ڪيل دستاويزن جي ترديد ڪئي هئي جنهن ۾ ايف بي آءِ ۽ انصاف واري کاتي تي الزام مڙهيو ويو هو ته انهن ادارن 2016ع جي چونڊن ۾ روس جي حوالي سان جاچ ۾ صدر ٽرمپ خلاف تعصب وارو اختيار ڪيو. ٻئي طرف آمريڪي نائب اٽارني جنرل ريچيل برانڊ استعيفيٰ ڏيڻ جو فيصلو ڪري ورتو آهي.