اربع 23 مئي 2018ع

شهري کي هٿيار ڏيکارڻ تي ايم ڪيو ايم پاڪستان جي اڳواڻ سلمان مجاهد خلاف ڪيس داخل

ويب ڊيسڪ: ڪراچي: پي ٽي آءِ جي ميمبر کي هٿيار ڏيکارڻ تي ايم ڪيو ايم پاڪستان جو اڳواڻ سلمان مجاهد بلوچ خلاف ڪيس داخل ڪيو ويو آهي. تحريڪ انصاف جي ڪارڪن تي مجاهد بلوچ طرفان مبينا طور تي هٿيار ڏيکاري ڌمڪيون ڏيڻ خلاف پي ٽي آءِ اڳواڻ خرم شير زمان، علي زيدي ۽ ڪارڪنن جو وڏو انگ گزري ٿاڻي پهتو جتي پوليس پي ٽي آءِ اڳواڻ عمران خان اسماعيل جي مدعيت ۾ قومي اسيمبلي جي ميمبر سلمان مجاهد بلوچ خلاف ڪيس داخل ڪيو. ان کان اڳ پي ٽي آءِ اڳواڻ عمران اسماعيل سنڌ جي گهرو وزير سان رابطو ڪيو ۽ معاملي تي نوٽيس وٺڻ جو مطالبو ڪيو جنهن تي سهيل انور سيال پوليس کي ايف آءِ آر داخل ڪرڻ جو حڪم ڏنو جنهن بعد ايڊيشنل آءِ جي مشتاق مهر کي سلمان مجاهد جي معاملي جي جاچ جو حڪم ڏئي ڇڏيو. ٻئي پاسي گهرو وزير چيو ته ڪنهن کي طاقت جي ناجائز استعمال جي اجازت نٿا ڏئي سگهون، ڪير به قانون کان مٿانهون ناهي. هن سلمان مجاهد بلوچ جي سيڪيورٽي واپس وٺڻ جو به حڪم ڏنو. هوڏانهن پي ٽي آءِ اڳواڻ جي ميمبر احسن علوي واقعي جي تفصيل ٻڌائيندي چيو ته گذريل شام اهو واقعو ڊفينس واري علائقي ۾ پيش آيو جڏهن قومي اسيمبلي جي ميمبر سلمان مجهد بلوچ زبردستي گاڏي ڪڍڻ جي ڪوشش ڪئي ۽ ان دوران اسان جي ۽ سندس گاڏي ڦاسي پئي، سلمان مجاهد بلوچ جيڪو ويگو گاڏي ۾ سوار هيو ۽ پاڻ ئي گاڏي هلائي رهيو هو رستو نه ملڻ تي هن پهرين ڊرائيونگ سيٽ تي ويٺي هٿيار ڏيکاريو ۽ بعد ۾ سندس گارڊ به لهي آيا ۽ انهن به هٿيار ڏيکاري ڊيڄاريو.