اربع 19 ڊسمبر 2018ء

ڀارت ۾ بم ڌماڪو، 09 فوجي مارجي ويا، 10ڄڻا زخمي

ويب ڊيسڪ: نئين دلي: ڀارتي رياست ڇتيس ڳڙهه ۾ بم ڌماڪي سبب 9 ڀارتي فوجي مارجي ويا ۽ 10 زخمي ٿي پيا. ڀارتي ميڊيا موجب رياست ڇتيس ڳڙهه جي ضلعي سڪما ۾ ڀارتي فوج جي بم پروف گاڏي ايم پي وي کي باردوي سرنگ سان اڏايو ويو جنهن جي نتيجي ۾ ان ۾ سوار 9 فوجي مارجي ويا ۽ 10 زخمي ٿي پيا. لاشن ۽ زخمين کي هيليڪاپٽر وسيلي اسپتال منتقل ڪيو ويو آهي جتي 4 زخمين جي حالت ڳڻتي جوڳي ٻڌائي پئي وڃي. ڪستارام جي علائقي ۾ نيم فوجي سينٽرل ريزرو پوليس فورس (سي آر پي ايف) طرفان مائو باغين خلاف آپريشن ڪيو پئي ويو ان دوران هڪ فوجي گاڏي کي نشانو بڻايو ويو. ڀارتي اختيارين واقعي جو الزام مائو باغين تي مڙهيندي ٻڌايو ته حملي آورن هڪ کان وڌيڪ باردوي سرنگون وڇايون هيون، مارجي ويل سمورين فوجين جو تعلق سي آر پي ايف جي 212 هين بٽالين سان هو. حڪومت واقعي کانپوءِ ڇتيس ڳڙهه رياست ۾ سيڪيورٽي کي هاءِ الرٽ ڪري ڇڏيو آهي. ڀارتي ميڊيا سوال اٿاريو آهي ته مارجي ويل اهلڪار بم پروف گاڏي مائن پروٽيڪٽڊ وهيل ۾ سوار هئا جيڪا ان حملي ۾ ڪيئن تباهه ٿي وئي.