جمعو 17  آگسٽ 2018ع

عبادتن ۽ فضيلتن سميت هڪ هزار مهينن جي برابر ليلته القدر سڀاڻي مذهبي عقيدت ۽ احترام سان ملهائي ويندي

حيدرآباد(ويب ڊيسڪ) عبادتن ۽ فضيلتن سميت هڪ هزار مهينن جي برابر ليلته القدر (اڄ) سومر 27 رمضان المبارڪ جي رات تي مذهبي عقيدت ۽ احترام سان ملهائي ويندي. اڪثر مسلمان اسڪالرن مطابق شب قدر 27 رمضان المبارڪ جي رات جو حاصل ٿيندي آهي پر اهو وڌيڪ بهتر آهي ته ان رات کي رمضان المبارڪ جي اڪي تاريخن ۾ تلاش ڪيو وڃي. پياري نبي حضرت محمد مصطفيٰ صلعم جن ليلته القدر بابت فرمايو آهي ته شب قدر کي رمضان المبارڪ جي آخري 10 ڏينهن دوران اڪي تاريخن 21، 23، 25، 27 يا 29 تاريخ تي تلاش ڪيو وڃي جن مان هڪ ڀلاري رات شب قدر ٿي سگهي ٿي. ان ڀلاري رات الله تبارڪ و تعاليٰ قرآن شريف جو نزول عطا فرمايو. ان رات سڄي دنيا جا مسلمان ڌڻي در خصوصي عبادتون ۽ دعائون ڪندا آهن. شب قدر جي حوالي سان ملڪ جي وڏين ۽ ننڍين مسجدن ۾ خصوصي انتظام ڪيا ويا آهن جڏهن ته سيڪيورٽي جا به نهايت سخت انتظام ڪيا ويا آهن.