خميس 21 مارچ 2019ء

نئين سال جي استقبال لاءِ تياريون مڪمل

حيدرآباد: سال 2018ع ڪيتريون ئي يادون ۽ تلخيون کڻي اڄ ماضي جو قصو بڻجي ويندو جڏهن ته پاڪستان سميت پوري دنيا ۾ نئين سال جي استقبال جون تياريون ڪيون پيون وڃن. گهڙي تي رات 12 وڄندي ئي سال 2019 جو استقبال آتش بازي ۽ برقي روشنين سان ڪيو ويندو. نئين سال جي جشن جي شروعات سڀ کان اڳ نيوزيلينڊ کان ٿيندي جنهن جي شهر آڪلينڊ جي مشهور سٽي ٽاور واري جاءِ تي هزارين ماڻهو جمع ٿيندا ۽ آسمان جي ڇهندڙ آتشبازي جو مظاهرو ڪندا. جاپان ۾ نئين سال کي ڀليڪار ڪرڻ لاءِ مختلف مندرن ۾ پنهنجي روايتن موجب رسمون ادا ڪيون پيون وڃن جڏهن ته آمريڪي شهر نيويارڪ جي ٽائمز اسڪوائر تي اڍائي هزار کان وڌيڪ ايل اي ڊي لائٽن سان ٺهيل ڪرسٽل بال جي رونمائي واري تقريب ۾ لکين ماڻهو شرڪت ڪندا. ڪراچي ۾ نئين سال جي جشن لاءِ سي ويو تي وڃڻ ۽ سمنڊ ۾ وهنجڻ تي پابندي لاڳو ڪئي وئي آهي ۽ منچلن کي سي ويو طرف وڃڻ جي اجازت نه هوندي.