خميس 21 مارچ 2019ء

پنجاب حڪومت جي نااهلي کي لکت ۾ حڪم جو حصو بڻائي رهيا آهيون: چيف جسٽس پاڪستان

لاهور: چيف جسٽس پاڪستان ميان ثاقب نثار پي ڪي ايل آءِ ڪيس ۾ ريمارڪس ڏنا ته پنجاب حڪومت جي نااهلي کي لکت ۾ حڪم جو حصو بڻائي رهيا آهيون. سپريم ڪورٽ لاهور رجسٽري ۾ چيف جسٽس پاڪستان ثاقب نثار جي سربراهي ۾ ٻه رڪني بينچ پاڪستان ڪڊني اينڊ ٽرانسپلانٽ انسٽيٽيوٽ بابت پاڻمرادي نوٽيس ڪيس جي ٻڌڻي ڪئي. سپريم ڪورٽ پنجاب حڪومت، صحت کاي ۽ صحت واري وزير ڊاڪٽر ياسين راشد تي سخت ڪاوڙ جو اظهار ڪندي چيو ته حڪومت 22 ارب لڳائي ڇڏيا پوءِ به اها اسپتال پرائيويٽ ماڻهن کي هلي وئي، پر اها واپس اچڻ گهرجي. چيف جسٽس سوال ڪيو هت پي ڪي ايل آءِ بابت قانونسازي جو ڇا بڻيو؟، صوبائي وزير صحت ياسمين راشد جواب ڏنو ته قانونسازي لاءِ مسودو قانون واري کاتي کي موڪليو ويو آهي. چيف جسٽس چيو ته گذريل ٻڌڻي تي به اوهان طرفان اهو ئي چيو ويو هو اوهان نه ٿا چاهيو ته سپريم ڪورٽ پنجاب حڪومت جي مدد ڪري، اهو ٻڌايو ته جگر جي پيوندڪاري جي آڦريشن جو ڇا بڻيو؟. ڊاڪٽر ياسمين راشد چيو ته چيف جسٽس صاحب فڪر نه ڪريو، ان تي به ڪم ڪري رهيا آهيون، ته چيف جسٽس پاڪستان چيو ته اها فڪر اوهان کي ڪرڻي آهي بي بي، پر اوهان ڪجهه نه پيا ڪريو هر ٻڌڻي تي اوهان ۽ پنجاب حڪومت زباني جمع خرچ ڪري اچي ويندا آهيو، ان ڪيس ۾ اوهان هر ٻڌڻي تي بهانو بڻائي رهيون آهن. چيف جسٽس چيو ته اسان اهو معاملو ختم ڪري ڇڏيون ٿا ڇو ته پنجاب حڪومت ۾ ايتري اهلڪيت ناهي، پنجاب ۾ نااهلي ۽ نڪمو پڻ پنهنجي انتها تي پهچي چڪو آهي اها نااهلي ئي آهي جو پنجاب حڪومت کان معاملا نه پيا هلن، اوهان کي پهريون آپريشن ڪرڻ لاءِ حتمي تاريخ ڏيڻي هئي پر اڄ به اوهان بهانا بڻائي رهيا آهيون، اوهان جي ڪارڪردگي صرف ڳالهين تائين آهي ۽ ڪجهه ناهي.