مڪاني کاتي واري صوبائي وزير سعيد غني جي صدارت هيٺ 13 ٽائون چيئرمينن جو اهم اجلاس ٿي گذريو.
اجلاس ۾ پيپلز پارٽي سنڌ جي جنرل سيڪريٽري ۽ وڏي وزير جو خاص مددگار سيد وقار مهدي، ميئر ڪراچي بئريسٽر مرتضيٰ وهاب ۽ سنڌ جي وڏي وزير جو صلاحڪار نجمي عالم پڻ شرڪت ڪئي.
ان موقعي تي صوبائي وزير سعيد غني چيو ته سڀئي ٽائون چيئرمين، پنهنجي وائيس چيئرمينن، يوسي چيئرمينن، وائيس چيئرمينن ۽ ڪائونسلرن سان مڪمل رابطي ۾ رهن، شهر مان ڪنهن به ٽائون وائيس چيئرمين يا ڪائونسلر جي شڪايت ملڻ تي فوري ڪارروائي ڪئي ويندي
صوبائي وزير سعيد غني چيو ته پارٽي چيئرمين بلاول ڀٽو زرداري جي خاص هدايتن تي ڪراچي جي سمورن شهرن ۽ يوسيز ۾ عوامي سهولتن جي فراهمي کي يقيني بڻائڻ لاءِ هدايتون جاري ڪيون آهن، ڪوشش آهي ته يونين ڪميٽين، يونين ڪائونسلن ۽ ٽائون ميونسپل جي سمورن ملازمن جون پگهارون ۽ رٽائرڊ ملازمن جي پينشن کي هر صورت ۾ يقيني بڻايو وڃي.
وقار مهدي چيو ته پيپلز پارٽي سنڌ جي صدر پاران پارٽي جي سمورن چيئرمينن کان ڪارڪردگي رپورٽ طلب ڪري ورتي آهي، ڪارڪردگي رپورٽ تي ايندڙ مهيني سمورن ٽائون چيئرمينن کان پڇا ڳاڇا ڪئي ويندي ۽ رپورٽ چيئرمين بلاول ڀٽو زرداري کي پيش ڪئي ويندي
هن چيو ته پارٽي چيئرمين واضح طور تي حڪم ڏنو آهي ته پارٽي جا چونڊيل نمائندا ۽ پارٽي تنظيم سازي کي وڌيڪ بهتر بڻائين ته جيئن ڪراچي جي عوام کي وڌ کان وڌ سهولتون فراهم ڪري سگهجن.
ڪراچي جي ميئر مرتضيٰ وهاب چيو ته ڪي ايم سي ۽ ٽائونز جي وچ ۾ لاڳاپا مضبوط ڪرڻ جي ڪوشش ڪيون پيا، جلد گڏجاڻي ڪري درپيش مسئلن جي حل کي يقيني بڻايو ويندو مرتضيٰ وهاب چيو ته ڪراچي جا سمورا 25 ٽائون جن کي گڏ کڻي هلنداسين، واٽر بورڊ، سنڌ سالڊ ويسٽ سميت سمورن ادارن کي به آن بورڊ ورتو ويندو، ڪراچي کي روشنين جو شهر ۽ مسئلن کان آجو بڻائڻ چاهيون ٿا
