سنڌ هاءِ ڪورٽ: ڪمند جو اگهه مقرر نه ڪرڻ خلاف درخواست تي ٻڌڻي

ڪراچي (ويب ديسڪ) سنڌ هاءِ ڪورٽ ۾ ڪمند جو اگهه مقرر نه ڪرڻ ۽ شگر ملز نه هلائڻ خلاف درخواست جي ٻڌڻي ٿي. عدالت سيڪريٽري زراعت ۽ ڪين ڪمشنر پاران جواب جمع نه ڪرائڻ تي ڪاوڙ جو اظهار ڪيو، ٻڌڻي دوران چيف سيڪريٽري، سيڪريٽري زراعت ۽ ڪين ڪمشنر جواب جمع ڪرائڻ لاءِ مهلت گھري ورتي. درخواست گذار جي وڪيل مريد علي شاهه موقف اختيار ڪيو ته سنڌ ۾ ڪمند جي نئين سيزن جي شروعات پهرين آڪٽوبر کان ٿي چڪي آهي، سنڌ حڪومت هن وقت تائين ڪمند جو اگهه مقرر ناهي ڪيو. وڪيل چيو ته ڪمند جو امدادي اگھه مقرر نه ڪرڻ ۽ پيڙهائي نه ڪرڻ سبب سنڌ جي آبادگارن کي سخت مالي نقصان ٿيڻ جو خدشو آهي، وڪيل چيو ته شگر ڪين ايڪٽ تحت پهرين آڪٽوبر کان اڳ ڪمند جو اگهه مقرر ڪري ملون هلائڻ گهرجن پر ان باوجود حڪومت ۽ شگر ڪين بورڊ پنهنجي ذميواري ادا نه ڪئي آهي جنهن ڪري سنڌ حڪومت، شگر ڪين بورڊ ۽ ٻين لاڳاپيل اختيارين کي فوري طور ڪمند جو اگهه مقرر ڪرڻ ۽ ملون هلائڻ جو حڪم ڏنو وڃي.