بلاول ڀٽو کي وزيراعظم بڻجندي ڏسي رهيو آهيان: منظور وساڻ

خيرپور (ويب ڊيسڪ) پاڪستان پيپلز پارٽيءَ جي اڳواڻ منظور حسين وساڻ چيو آهي ته مستقبل ۾ ڪنهن نه ڪنهن طرح بلاول ڀٽو زرداريءَ کي وزيراعظم بڻجندي ڏسي رهيو آهيان. خيرپور ۾ پريس ڪانفرنس ڪندي منظور وساڻ چيو ته 27 هين آئيني ترميم ۾ جي يو آءِ پيپلز پارٽيءَ جو ساٿ ڏيندي، اڳ به جي يو آءِ اسان جو ساٿ ڏنو آهي. هن چيو ته مستقبل ۾ بلاول ڀٽو زرداريءَ کي وزيراعظم ڏسي رهيو آهيان، پي ٽي آءِ وارا اڳ به وڙهندا رهيا آهن پر کين هن وقت تائين فائدو ناهي ٿيو، اسان جھيڙو تڪرار ڪرڻ وارا ماڻهو ناهيون، امن امان جي خواهش رکندڙ آهيون. منظور وساڻ وڌيڪ چيو ته پي ٽي آءِ وارن جا پاڻ ۾ اختلاف آهن، هو پاڻ ۾ ناهن ٺهندا، اڳتي هلي پي ٽي آءِ ڀڃ ڊاهه جو شڪار ٿي ويندي ۽ ان ۾ ڌڙا بندي ٿي ويندي، جيستائين پي ٽي آءَ باني جيل اندر آهي تيستائين بشريٰ بي بي ۽ ان جي پارٽي ڏکيائين ۾ آهي. 18 هين ترميم ۾ به اهي ئي شرط هئا جيڪي 26 هين آئيني ترميم ۾ آهن.