ڪي اليڪٽرڪ پاران 2022.23 ۾ ڪرنٽ لڳڻ سبب مرندڙ سڀ نشئي قرار: رپورٽ جمع

ڪراچي (ويب ڊيسڪ) نيشنل اليٽرڪ پاور ريگوليٽري اٿارٽي (نيپرا) ۾ ڪي اليڪٽر جي انتظام هيٺ علائقن سال 2022.23 ۾ ٿيندڙ موتن تي جواب جمع ڪراچي ڇڏيو آهي، جنهن ۾ مري ويندڙ گھڻن ماڻهن کي نشي جو عادي قرار ڏنو ويو آهي. ڪي اليڪٽرڪ طرفان نيپرا ۾ جمع جواب موجب ڪراچي ۾ ويسٽ هارف ۾ ڪرنٽ لڳڻ سبب مرندڙ شهري کي نشي جو عادي قرار ڏنو ويو، هڪ شهري سب اسٽيشن مان بجلي چوريءَ جي ڪوشش ۾ ڪرنٽ لڳڻ سبب فوت ٿيو. ملير ۾ نشي جو عادي 11 ڪي وي انڊر گرائونڊ ڪيبل چوري ڪندي مري ويو هو، ذهني مريض دلدار ڪاوڙ ۾ اچي 11 ڪي وي جي ٿنڀي تي چڙهي موت جي منهن ۾ ويو. ڪي اليڪٽرڪ جي جواب ۾ چيو ويو آهي ته سپر هاءِ وي ويجھو گڏاپ ۾ نشي جي عادي شخص بجلي چوري ڪندي مري ويو. گلشن معمار ۾ نشي جي عادي شخص بجلي چوري دوران ڪرنٽ لڳڻ سبب فوت ٿيو.سائيٽ جي علائقي ۾ ڪرنٽ لڳڻ سبب مرندڙ شخص به نشي جو عادي هو، ڪورنگي ۾ سب اسٽيشن مان لاش مليو هو جنهن کي پڻ نشي جو عادي قرار ڏنو ويو، بن قاسم جي علائقي ۾ به ڪرنٽ لڳڻ سبب مرندڙ نشئي هو. ياد رهي ته ڪي اليڪٽرڪ جي انتظام هيٺ علائقن ۾ سال 2022.23 دوران 33 شهري ڪرنٽ لڳڻ سبب موت جو شڪار بڻيا هئا.