نٿو لڳي ته ٽرمپ باني پي ٽي آءِ جي آزاديءَ جي لاءِ چوندو: خواجه آصف

اسلام آباد (ويب ڊيسڪ)دفاع واري وفاقي وزير خواجه آصف چيو آهي ته آمريڪا سان جتي ٻه طرفن لاڳاپن جي ڳالهه ٿيندي ته ان سان گڏ هلنداسين، جتي ضرورت پئي ڀرپور اختلاف ڪيو ويندو. آمريڪي اليڪشن تي خانگي ٽي وي چينل سان ڳالهائيندي خواجه آصف چيو ته غزه، لبنان ۽ عراق ۾ جنگ بندي ضروري آهي ان معاملي تي ڪا به ڳالهه ٻول نٿي ٿي سگھي. خواجه آصف چيو ته نسل ڪشي بند ٿيڻ گھرجي ۽ نئين آمريڪي حڪومت کي جنگ بنديءَ جي لاءِ قدم کڻڻا پوندا، جنگ بندي گڏيل قومن سميت ڪنهن به فورم تي ٿئي ان جي آجيان ڪنداسين. سندس چوڻ هو ته اسان کي نٿو لڳي ته ٽرمپ باني پي ٽي آءِ جي آزاديءَ جي لاءِ چوندو، هڪ شخص خاطر ڪو به پنهنجا لاڳاپا خراب نه ڪندو. خواجه آصف وڌيڪ چيو ته آمريڪا ۾ به اسٽيبلشمينٽ جي حڪومت آهي، اتي پاڪستان کان وڌيڪ مضبوط اسٽيبلشمينٽ موجود آهي.