ملڪ جي اڪثر علائقن ۾ سيءُ وڌي ويو، اسڪردو ۾ پارو مائينس 6 ڊگري تي پهچي ويو

ڪراچي (ويب ڊيسڪ) ملڪ جي اڪثر شهرن ۽ علائقن ۾ سيءَ ۾ واڌ اچي وئي آهي، اسڪردو ۾ پارو مائينس 6 ڊگري سينٽي گريڊ تائين پهچي ويو، جڏهن ته گلگت ۾ گرمي پد هڪ ڊگري سينٽي گريڊ رڪارڊ ڪيو ويو. ڊپٽي ڪمشنر اسڪردو موجب گھڻي برف پوڻ جي ڪري ڪاغان ناران روڊ ڏانهن ويندڙ روڊن کي سياحن لاءِ بند ڪيو ويو آهي، جڏهن ته ناران ۽ ٻين مٿانهن علائقن ۾ هوٽلون به بند ڪيون ويون آهن. سخت برفباريءَ سبب علائقن ۾ بجلي ۽ ٻيون بنيادي سهولتون به موجود ناهن. هوڏانهن ڪوئيٽا جي وادي ۽ ان جي آسپاس گذريل رات دير سان برساتن جو سلسلو شروع ٿي ويو آهي، موسميات کاتي طرفان اتر بلوچستان، مٿيون خيبر پختون خواه، گلگت بلتستان، ڪشمير ۽ پوٽوهار خطي ۾ برساتن ۽ جبلن تي برف پوڻ جي اڳڪٿي ڪئي وئي آهي. ٻئي طرف لاهور جو هوائي معيار اڄ به صحت لاءِ خطرناڪ آهي، جڏهن ته هوائي گدلاڻ ۾ ڀارت جي گاديءَ وارو هنڌ نئين دهلي سڀني شهرن کان مٿي آهي، لاهور شهر ٻئي نمبر تي آهي.