عمر ايوب ۽ فيصل امين جي راهداري ضمانت منظور

پشاور (ويب ڊيسڪ) پشاور هاءِ ڪورٽ ۾ پي ٽي آءِ اڳواڻ عمر ايوب ۽ فيصل امين جي راهداري ضمانت وارين درخواستن تي ٻڌڻي ٿي، عدالت عمر ايوب ۽ فيصل امين جي 21 ڊسمبر تائين راهداري ضمانت ڏئي ڇڏي. پشاور هاءِ ڪورٽ ۾ پي ٽي آءِ اڳواڻ عمر ايوب ۽ فيصل امين جي راهداريءَ وارين درخواستن تي ٻڌڻي ٿي، جسٽس شڪيل احمد راهداري ضمانت جي درخواستن جي ٻڌڻي ڪئي. جسٽس شڪيل احمد رمارڪس ڏنا ته ملڪ سلامت آهي ته اسان به آهيون، اوليت ملڪ هجڻ گھرجي، جيڪي مسئلا آهن انهن کي پارليامينٽ ۾ ويهي حل ڪريو، جڏهن ڪو اڻوڻندڙ واقعو ٿيندوآهي ته ملڪ کي نقصان پهچندو آهي. جسٽس شڪيل احمد چيو ته ”ڪو سيڪيورٽي وارو زخمي ٿئي ٿو ته اهو به هن ملڪ جو پٽ آهي، عمر ايوب صاحب! توهان مخالف ڌر اڳواڻ آهيو، توهان تي وڌيڪ ذميواري لاڳو ٿئي ٿي، حڪومت کي به ذميواريءَ جو مظاهرو ڪرڻ گھرجي.“ جسٽس شڪيل احمد وڌيڪ رمارڪس ۾ چيو ته مسئلا ويهي حل ڪريو، ان ۾ سڀني جي بهتري آهي. ان موقعي تي عمر ايوب چيو ته مان مخالف ڌر جو ليڊر ۽ جڊيشل ڪميشن جو ڪارڪن آهيان، منهنجي خلاف تمام گھڻيون ايف آءِ آرون داخل ڪيون ويون آهن، ايستائين جو موٽر سائيڪل چوريءَ جا 3 ڪيس داخل ڪيا ويا آهن.