سنڌ حڪومت واضح ڪري چڪي ته سنڌوءَ تي ڪو ڪينال نه ٺهندو: شرجيل انعام ميمڻ

ٽنڊو ڄام (ويب ڊيسڪ) سنڌ جي سينيئر صوبائي وزير شرجيل انعام ميمڻ چيو آهي ته سنڌ حڪومت واضح چئي چڪي آهي ته ڪو به ڪينال نه ٺهندو.

پيپلزپارٽي جي واضح موقف بعد انهن تحريڪن جو ڪو فائدو ناهي، ڪينالن تي ڪو تحريڪ هلائڻ چاهي ٿو ته اهو ان جو جمهوري حق آهي، پر معاملي تي ڪوڙ ڳالهائي عوام کي ورغلايو پيو وڃي.

ٽنڊي ڄام ۾ 100 ماڻهن کي سولر سسٽم ورهائڻ واري تقريب کي خطاب ڪندي شرجيل انعام ميمڻ جو چوڻ هو ته سنڌ حڪومت پارٽي قيادت جي حڪم تي عوام جي خدمت ڪري پئي.

2 لک کان وڌيڪ خاندانن کي بنا ڪنهن فرق جي سولر سسٽم ڏنو پيو وڃي، مستحق ماڻهن ۾ سولر سسٽم ورهائڻ بلاول ڀٽو زرداري جو ويزن آهي.

شرجيل ميمڻ چيو ته بلاول ڀٽو زرداري اهي ڪم ڪيا آهن، جيڪي تاريخ ۾ ڪنهن ناهن ڪيا، بجلي جا ڳرا بل برداشت نه ڪندڙن کي سولر سسٽم ڏنو پيو وڃي.

سنڌ جي سينيئر صوبائي وزير شرجيل انعام ميمڻ چيو ته سولر سسٽم ڪنهن امير يا زميندار کي نه پرغريبن ۽ هارين کي ملندو.

ان موقعي تي صوبائي وزير ناصر شاهه جو چوڻ آهي ته عوام جي خدمت پيپلزپارٽي جي پهرين ترجيح آهي، پيپلزپارٽي سنڌ ۾ 2 هزار کان وڌيڪ سيٽون حاصل ڪيون.

ناصر حسين شاهه جو چوڻ هو ته ايندڙ اليڪشن ۾ به پيپلزپارٽي اڪثريت سان ڪاميابي حاصل ڪندي، ملڪ جو ايندڙ وزيراعظم بلاول ڀٽو زرداري هوندو.