اسلام آباد (نيشنل ڊيسڪ) پاڪستان پيپلز پارٽيءَ جي چيئرمين بلاول ڀٽو زرداريءَ چيو آهي ته دهشتگرديءَ جي باهه چئني صوبن ۾ ڀڙڪي رهي آهي.
قومي اسيمبليءَ جي اجلاس کي خطاب ڪندي بلاول ڀٽو زرداري چيو ته دهشتگرديءَ خلاف هر صوبي جو پنهنجو نظريو آهي.
ڪامياب آپريشن تي سيڪيورٽي فورسز کي ڀيٽا پيش ڪريون ٿا، دهشتگردي جي ڪري پيپلزپارٽي ۽ پاڪستان کي گهڻو نقصان پهتو.
بلاول ڀٽو زرداري چيو ته ننڍپڻ ۾ مون کي وزيراعظم هائوس مان اغوا ڪرڻ جي ڪوشش ڪئي وئي، بينظير ڀٽو جي شهادت کانپوءِ ملڪ ۾ دهشتگرديءَ جي واقعن ۾ واڌ ٿي.
هن چيو ته محترمه بينظير ڀٽو کي به شهيد ڪيو ويو، پيپلزپارٽي هر قسم جي دهشتگرديءَ جي مذمت ڪري ٿي. پيپلزپارٽي به دهشتگرديءَ جو شڪار رهي آهي.
دهشتگردي جي ڪري ملڪ کي تمام گهڻو نقصان پهتو آهي، دهشتگرديءَ ۽ سياسي انتهاپسندي سبب ملڪ کي نقصان پهتو، پاڪستان جي ترقي لاءِ دهشتگرديءَ جو خاتمو اڻٽر آهي.
پ پ چيئرمين چيو ته پاڪستان ۾ دهشتگرديءَ جو مسئلو نئون نه پر پراڻو آهي، فوج ۽ پوليس دهشتگرديءَ خلاف قربانيون ڏنيون آهن.
بلاول ڀٽو زرداري نيشنل ايڪشن پلان ٽو جوڙڻ جو مطالبو ڪري ڇڏيو، هن چيو ته نوازشريف پنهنجي دور ۾ نيشنل ايڪشن پلان جوڙيو هو.
اسان سڀني کي گڏجي دهشتگرديءَ جو مقابلو ڪرڻو پوندو، دهشتگردن جو مقصد رڳو رتوڇاڻ آهي، دهشتگردن جو ڪو به مذهب ناهي، هو رڳو رتو ڇاڻ چاهين ٿا.
بلاول ڀٽو زرداري چيو ته دهشتگرديءَ خلاف سمورين پارٽين جو هڪ موقف هجڻ گهرجي، صدر آصف علي زرداري جي تقرير دوران ايوان ۾ گوڙ ڪيو ويو. صدر آصف علي زرداري دهشتگردي ۽ معيشت تي ڳالهايو،
صدر گڏيل پارليامينٽ جي اجلاس ۾ پاڻي جي معاملي تي به ڳالهايو، صدر آصف علي زرداري تڪراري ڪينالن جي مخالفت ڪئي.
