وزيراعظم شهباز شريف جي صدارت ۾ صوبائي ۽ هٿياربند قيادت سان اجلاس ٿيو، اجلاس ۾ ملڪ دشمن مهم جو روايتي ۽ ڊجيٽل طريقي سان جواب ڏيڻ جو فيصلو.
اسلام آباد (ويب ڊيسڪ) وزيراعظم شهباز شريف جي صدارت هيٺ صوبائي ۽ هٿياربند قيادت سان اجلاس ٿيو جنهن ۾ ملڪ دشمن مهم جو روايتي ۽ ڊجيٽل طريقي سان جواب ڏيڻ جو فيصلو ڪيو ويو.
ذريعن موجب دهشتگرديءَ خلاف حڪومت جي واضح موقف تي گذريل ڏينهن وزيراعظم هائوس ۾ اجلاس ٿيو جنهن ۾ هٿياربند ۽ سول قيادت، چئني صوبن ۽ آزاد ڪشمير ۽ گلگت بلتستان جا نمائندا به شريڪ ٿيا.
ذريعن موجب اجلاس ۾ فيصلو ٿيو ته جعفر ايڪسپريس تي حملو ڪندڙن کي دنيا جي سامهون وائکو ڪرڻ ۾ ڪا ڪسر نه ڇڏي وڃي، روايتي ۽ ڊجيٽل ميڊيا تي ملڪ دشمن مهم جو اثرائتو جواب ڏنو وڃي.
اجلاس ۾ نيشنل ايڪشن پلان تحت قومي بيانيي کي مضبوط ڪرڻ تي اتفاق ڪيو ويو، فيصلو ٿيو ته دهشتگردن ۽ شر پکيڙيندڙن جي روڪٿام لاءِ اثرائتو سرگرم بيانيو جوڙيو وڃي.
اجلاس ۾ فيصلو ڪيو ويو ته قومي بيانيي ۽ ملڪ جي سلامتيءَ جي خلاف ڪنهن به قسم جي مواد جي روڪٿام جو بندوبست ڪيو ويندو.
ذريعن موجب اجلاس ۾ ملڪي سلامتي ۽ هم آهنگي لاءِ سمورن صوبن جو سهڪار ۽ رابطا وڌائڻ تي اتفاق ڪيو ويو.
اجلاس ۾ فيصلو ٿيو ته قومي بيانيو نوجوانن تائين پهچائڻ لاءِ فلم ۽ ڊرامن ۾ قومي موضوع اپنايا ويندا، چارئي صوبا فلم ۽ ڊرامن ۾ دهشتگردن جي بيانيي جو اثرائتو مقابلو ڪرڻ لاءِ سهڪار ڪندا.
