وزيراعظم پاران اعلان موجب گھريلو صارفن لاءِ بجليءَ جو في يونٽ 7 رپيا 41 ۽ صنعتن جي لاءِ 7 رپيا 59پئسا في يونٽ سستي
اسلام آباد (نيشنل ديسڪ) وزيراعظم پاران بجلي اگهن ۾ 7 رپيا 41 پئسا في يونٽ گهٽائي جو اعلان ڪيو ويو، جڏهن ته صنعتن لاءِ بجلي 7 رپيا 59 پئسا في يونٽ سستي ڪرڻ جو اعلان ڪيو ويو.
وزيراعظم پاران اعلان موجب گھريلو صارفن جي لاءِ بجليءَ جو في يونٽ 7 رپيا 41 ۽ صنعتن جي لاءِ 7 رپيا 59پئسا في يونٽ سستي ڪئي وئي.
بجليءَ جي اگھن ۾ گھٽتائيءَ واري حڪومتي پيڪيج بابت اسلام آباد ۾ تقريب کي خطاب ڪندي وزيراعظم چيو ته اسان پنهنجي سياست رياست لاءِ قربان ڪئي.
حڪومت سنڀالي ته گهڻن چئلينجن کي منهن ڏيڻو پيو، حڪومت سنڀالي ته پاڪستان مٿان ڏيوالپڻي جِي تلوار لٽڪي رهي هئي.
وزراعظم چيو ته پاڪستان جي معاشي ترقي جي خوشخبري ٻڌائڻ آيو آهيان، منشور ۾ جيڪو واعدو ڪيو هو، اهو پورو ڪرڻ وڃي رهيو آهيان.
ملڪ ۾ مهانگائي سنگل ڊجٽ تي اچي چڪي آهي، مهانگائي 38 سيڪڙو مان ڏيڍ سيڪڙو تي اچي چڪي آهي، وفاقي ڪابينا آسان ڪاروبار ايڪٽ جي منظوري ڏني آهي.
شهباز شريف چيو ته تيزي سان منزل طرف وڌي رهيا آهيون، معاشي استحڪام جي سفر ۾ آرمي چيف ڀرپور سهڪار ڪيو، پوري خطي ۾ پيٽرول جي قيمت سڀني کان گهٽ آهي.
وزيراعظم چيو ته پاليسي ريٽ 12 سيڪڙو تي اچي چڪو آهي، پاڪستان پنهنجو وڃايل مقام حاصل ڪندو.
هن چيو ته معيشت جي بهتري لاءِ سرجري ڪرڻي پوندي، معيشت ۾ بنيادي استحڪام اچي چڪو آهي، هڪ سال ۾ پيٽرول جي قيمت 38 رپيا في ليٽر گهٽ ڪئي.
شهباز شريف چيو ته بجلي جي قيمت گهٽائڻ تائين ملڪي معيشت ترقي نه ڪندي، بجلي جي قيمت ۾ ترقي ۽ خوشحالي ۾ وڏي رڪاوٽ آهي.
