اسان واعدو ڪيو هو ته ڪئنال نه ٺهڻ ڏينداسين ۽ اسان اُهو واعدو پورو ڪيو: ميرپور خاص ۾ جلسي کي خطاب
ميرپورخاص (ويب ڊيسڪ) پ پ چيئرمين بلاول ڀٽو زرداري جي مخالفن تي ڇتي تنقيد، سندس چوڻ آهي ته ڪئنالن واري مسئلي تي سياسي يتيم احتجاج نه پر جشن ملهائي رهيا هئا.
ميرپورخاص ۾ جلسي کي خطاب ڪندي بلاول ڀٽو زرداري چيو ته صدر زرداري کي نشانو بڻائي سياست چمڪائڻ جي ڪوشش ڪئي وئي.
صدر زرداري طئي ڪيو هو ته اسان نوان ڪئنال نه ٺهڻ ڏينداسين، اسان واعدو ڪيو هو ته ڪئنال نه ٺهڻ ڏينداسين ۽ اسان اُهو واعدو پورو ڪيو.
هن چيو ته سنڌو درياهه کي بچائڻ لاءِ آخري حد تائين وينداسين، ڀارتي وزيراعظم نريندر مودي کي به چتاءُ ڏيندي چيائين ته مودي جي جارحيت جو ڀرپور جواب ڏنو ويندو.
بلاول ڀٽو زرداري چيو ته مودي سنڌو درياهه تي حملو ڪيو آهي، سنڌ طاس معاهدو هڪ طرفو ختم نٿو ڪري سگهجي.
هن چيو ته ڀارت حملو ڪيو ته کيس منهن ٽوڙ جواب ڏنو ويندو،سنڌو درياهه ۾ يا ته پاڻي وهندو يا هنن جو رت وهندو.
