ڀارت شهري علائقن کي نشانو بڻائي عالمي قانون، گڏيل قومن جي چارٽر ۽ پاڪستان جي خودمختياري جي ڀڃڪڙي: صدر/وزيراعظم
اسلام آباد (نيشنل ڊيسڪ) صدر آصف زرداري ۽ وزيراعظم شهباز شريف طرفان ڀارتي اڳرائي جي سخت لفظن ۾ مذمت.
صدر آصف علي زرداري چيو آهي ته ڀارت پاران شهري علائقن کي نشانو بڻائڻ ۽ بناجواز ڀارتي حملو عالمي قانون، گڏيل قومن جي چارٽر ۽ پاڪستان جي خودمختياري جي ڀڃڪڙي آهي.
ڀارت جا بزدلاڻا قدم فاشسٽ حڪومت جو حقيقي چهرو وائکو ڪن ٿا، ڀارتي حڪومت پنهنجي سياسي ايجنڊا کي اڳتي وڌائڻ لاءِ علائقائي امن ۽ سلامتي داءَ تي لڳائڻ لاءِ تيار آهي.
صدر آصف علي زرداريءَ جو وڌيڪ چوڻ هو ته هٿياربند فوج وطن جي هڪ هڪ انچ جي دفاع لاءِ پوري طرح تيار آهي.
وزيراعظم شهباز شريف چيو ته دشمن کي ڪڌن مقصدن ۾ ڪامياب ٿيڻ نه ڏيندا، قوم ۽ پاڪ فوج پاڪستان جي دشمن کي منهن ڏيڻ چڱي ريت ڄاڻي ٿي.
وزيراعظم شهباز شريف جو وڌيڪ چوڻ هو ته پاڪستان طرفان ڀارت جي بزدلاڻي حملي جو ڀرپور ۽ اثرائتو جواب ڏنو پيو وڃي.
