95

آصف علي زرداري پيٽرول جي اگهه ۾ واڌ تي ڳڻتي ظاهر ڪري ڇڏي، معاشي ٽيم بابت شهباز شريف سان ڳالهائڻ جو فيصلو

آصف علي زرداري پيٽرول جي اگهه ۾ واڌ تي ڳڻتي ظاهر ڪري ڇڏي، معاشي ٽيم بابت شهباز شريف سان ڳالهائڻ جو فيصلو

اسلا م آباد ( بيورو رپورٽ ) اڳوڻي صدر  آصف علي زرداري پيٽرول جي اگهه ۾ واڌ تي ڳڻتي ظاهر ڪري ڇڏي آهي ۽ حڪومت جي معاشي ٽيم بابت وزيراعظم شهباز شريف سان ڳالهائڻ جو فيصلو پڻ ڪري ورتو آهي. ان سلسلي ۾ جاري ڪيل هڪ بيان ۾ اڳوڻي صدر آصف علي زرداري چيو ته پيپلز پارٽي حڪومت جو حصو آهي ۽ ان سان گڏ آهي، اهڙي قسم جي فيصلن تي مشاورت ضرور ٿيڻ گهرجي. هن وڌيڪ چيو ته اسين سڀ هن حڪومت ۾ عوام کي رليف ڏيڻ جي لاءِ آيا آهيون ۽ عوام کي رليف ڏيڻ ئي اسان جي پهرين ترجيح هئڻ گهرجي.اسين وزيراعظم سان گڏ آهيون، جلد ساڻس ملاقات ڪندس جنهن ۾ معاشي ٽيم بابت پڻ ڳالهه ٻولهه ٿيندي. ٻي پاسي مسلم ليگ ن جي سربراهه نواز شريف به پيٽرول جو اگهه وڌائڻ جي مخالفت ڪري ڇڏي آهي ۽ هو هڪ ڏينهن اڳ ان معاملي تي ڪاوڙجي هلندڙ گڏجاڻي مان پڻ  اٿي هليو ويو. ان سلسلي ۾ ن ليگ جي نائب صدر مريم نواز پنهنجي هڪ ٽويٽ ۾ چيو آهي ته ميان نواز شريف پڻ ھن فيصلي جي سخت مخالفت ڪئي ۽ ايتري تائين چئي ڇڏيو تھ آئون ھڪ پئسي جو بھ بارعوام تي وجھي نٿو سگھان، جيڪڏھن پيٽرول جو اگهه وڌائڻ ۾ حڪومت جي ڪا مجبوري آھي تھ ان فيصلي ۾ مان شامل نه آھيان، ايئن چئي هو ميٽنگ پڻ ڇڏي هليو ويو . مريم نواز وڌيڪ چيو ته آئون عوام سان گڏ بيٺل آهيان ۽ ان فيصلي جي تائيد نه ٿي ڪري سگهان.

هن خبر تي پنهنجي راءِ جو اظهار ڪريو.

پنهنجي راءِ ڏيو