ميهڙ(ن سوڀ) ميهڙ ۾ هڪ هفتو اڳ ميهڙ باءِ پاس وٽ زميني تڪرار تان قتل ٿيل عباس کوسو جي قاتلن جي گرفتاري لاءِ کوسا برادري اصغر کوسو، سڪندر کوسو ۽ ٻين جي اڳواڻي ۾ انڊس هاءِ وي تي ٻيٽو باءِ پاس وٽ احتجاجي مظاهرو ڪري ڌرڻو هنيو. مظاهرين روڊ تي ٽائرن کي باهيون ڏئي روڊ بلاڪ ڪري ڇڏيو، جنهن سبب لاڙڪاڻي ۽ ڪراچي ڏانهن ايندڙ ويندڙ گاڏين جون قطارون لڳي ويون، جڏھن ته روڊ ڪراس ڪرڻ دوران کوسا برادري جي ڏنڊا بردار ماڻھن، ڊرائيورن ۽ مسافرن ۾ ڇڪتاڻ ٿيندي رهي. ان موقعي تي اصغر کوسو چيو ته هٿيار بندن عباس کوسو کي قتل ڪيو پر ميهڙ پوليس قاتلن کي گرفتار ڪرڻ بدران انهن جي سهولتڪار ۽ محافظ بڻيل آھي. هنن آءِ جي سنڌ، ڊي آءِ جي حيدرآباد ۽ ايس ايس پي دادو کي اپيل ڪئي ته عباس کوسو جا قاتل جلد گرفتار ڪيا وڃن.
290
