لاهور (ويب ڊيسڪ) ن ليگ جي نائب صدر مريم نواز جو چوڻ آهي ت مينارِ پاڪستان جلسي سان ووٽ چور گهٻرائجي ويا آهن، لاهور جي تاريخ ۾ اهڙو ڪامياب جلسو ڪڏهن به ناهي ٿيو. لاهور ۾ ن ليگ جي مجلس عاملا، ورڪنگ ڪميٽين ۽ پارليامينٽ ميمبرن جي گڏيل اجلاس کي خطاب ڪندي مريم نواز جو چوڻ هو ته مينار پاڪستان جي ڪامياب جلسي تي الله تعاليٰ ۽ عوام جو شڪريو ادا ڪريان ٿي، جلسي دوران خبر پئجي وئي ته ميڊيا کي هدايتون ڪٿان اچي رهيون آهن، پر اسان کي ان سان ڪوبه فرق نٿو پوي، جلسو ڏسندڙ ڄاڻين ٿا ته جيترو وڏو جلسي جو ميدان هو ان کان وڌيڪ وڏو جلسو ٻاهر به هو، انهن سڀني کي گڏ ڪيو وڃي ته شايد لاهور جي تاريخ ۾ اهڙو ڪامياب جلسو نه ٿيو هوندو، هي خاص ڪري عوام جو جلسو هو، اتي بيهي مان سوچي رهي هئس ته جلسي گاهه ننڍو پئجي ويو آهي. مريم نواز جو وڌيڪ چوڻ هو ته پاڪستان جي تاريخ ۾ ڪا اهڙي پارٽي ناهي جنهن کي تڪليفن مان نه گذرڻو پيو هجي، پارٽي سان لاڳاپيل سمورن ماڻهن جي همت کي سلام پيش ڪريان ٿي، مينار پاڪستان واري جلسي سان ووٽ چور گهٻرائجي ويا آهن ۽ کين هاڻي پريشان ٿيڻ به گهرجي.
314
