ڄامشورو (ڊسٽرڪٽ رپورٽر) کاڻوٺ ڀرسان لاکڙا ڪول مائنز ۾ افسوسناڪ واقعي ۾ ٽريڪٽر ڊرائيور پنهنجي ئي ٽريڪٽر هيٺان اچي ڇيڀاٽجي فوت ٿي ويو آهي. لاکڙا ڪول فيلڊ جي انڊس ڪول مائنز ۾ ٽرڪ اسٽارٽ نه ٿيڻ سبب ٽريڪٽر ذريعي ٽرڪ کي ڇڪڻ دوران حادثو پيش آيو، گذريل رات کان خراب حالت ۾ بيٺل ٽرڪ کي ٽريڪٽر ذريعي ڇڪڻ جي ڪوشش ڪئي وئي ته اچانڪ ٽرڪ اسٽارٽ ٿي ٽريڪٽر سان پويان کان ٽڪرائجي وئي، ٽڪر لڳڻ سبب ٽريڪٽر ڪلٽي ٿي پيو جنهن جي هيٺان اچي ٽريڪٽر ڊرائيور 28 ورهين جو علي اصغر کوسو موقعي تي چيڀاٽجي فوت ٿي ويو. فوتي جي لاش کي وڏي جدوجهد کانپوءِ مقامي ماڻهن ٻاهر ڪڍي ڳوٺ مستي کوسو لڳ انڊس ڪول مائنز منتقل ڪيو، لاش پڄڻ تي گهر ۾ قهرام مچي ويو. فوتي ڊرائيور علي اصغر کوسو پنهنجي ئي مائٽن جي ٽرڪ کي اسٽارٽ ڪرڻ لاءِ ويو ته اجل جو شڪار ٿي ويو. هوڏانهن ڪول مائنز پوليس ٽرڪ کي تحويل ۾ وٺي ڇڏيو آهي.
241
