لاڙڪاڻو (بيورو رپورٽ) لاڙڪاڻي ڀرسان ڪنگا ٿاڻي جي حد نيو بس اسٽينڊ روڊ کوسا ڳوٺ وٽ تيز رفتار ٽريڪٽر جو موٽر سائيڪل سان ٽڪر ٿي پيو، جنھن جي نتيجي ۾ 3 ڏينهن اڳ پرڻيل نصير آباد تعلقي جي ڳوٺ رحمو جي رهواسڻ نوجوان عورت ڇٽا خاتون زال رياض کوسو ٿڏي تي فوت ٿي وئي، جڏهن ته حادثي بعد ڊرائيور ٽريڪٽر ڇڏي فرار ٿي ويو، بعد ۾ وارثن فوتي عورت جو لاش کڻائي چانڊڪا اسپتال جي حادثن واري شعبي ۾ آندو، جتي ضروري ڪارروائي بعد لاش وارثن حوالي ڪيو ويو. ان موقعي تي فوتي عورت جي وارثن ٻڌايو ته اسان جا وارث نصيرآباد کان لاڙڪاڻي جي اسپتال دوا وٺڻ لاءِ اچي رهيا هئا ته رستي ۾ حادثو پيش آيو آهي. هوڏانهن فوتي عورت جو لاش وارث ڳوٺ کڻائي ويا، جتي لاش گھر پھچڻ تي ڪهرام مچي ويو، جڏهن ته آخري اطلاعن تائين اهڙو ڪيس داخل ٿي نه سگهيو ۽ نه ئي ڪا گرفتاري عمل ۾ اچي سگهي هئي.
314
