اسلام آباد (ويب ڊيسڪ) پاڪ_افغان سرحد تي سيڪيورٽي فورسز جي آپريشن ۾ 3 دهشتگرد مارجي ويا آهن. پاڪ فوج جي سڌ سماءَ واري شعبي آءِ ايس پي آر مطابق پاڪ_افغان سرحد ويجهو لوئر دير ۾ آپريشن دهشتگردن جي داخل ٿيڻ جي ڪوشش کي ناڪام بڻائڻ لاءِ ڪيو ويو. آءِ ايس پي آر ٻڌايو ته ڳجهي اطلاع تي ڪيل آپريشن دوران فائرنگ جي ڏي وٺ ۾ 3 دهشتگرد مارجي ويا، مارجي ويل دهشتگردن وٽان وڏي انگ ۾ هٿيار، بارودي مواد ۽ گرنيڊ هٿ ڪيا ويا. آءِ ايس پي آر جو چوڻ آهي ته مارجي ويل دهشتگردن ۾ عابد ۽ يوسف خان جو تعلق سوات جڏهن ته عبدالستار جو تعلق مردان سان آهي. آءِ ايس پي آر مطابق مارجي ويل دهشتگرد 2019ع ۾ سوات ۾ ٽارگيٽ ڪلنگ جي ڪيترن ئي واقعن ۾ ملوث هئا، جڏهن ته مقامي ماڻهن دهشتگردن خلاف سيڪيورٽي فورسز جي آپريشن کي ساراهيندي دهشتگردي جي خاتمي لاءِ مڪمل حمايت واري عزم جو اظهار ڪيو.
194
