اسلام آباد (ويب ڊيسڪ) اليڪشن ڪميشن سينيٽ چونڊون شفاف بڻائڻ لاءِ اميدوارن کان قسم نامون وٺڻ جو فيصلو ڪيو آهي. سينيٽ چونڊن ۾ اميدوارن کان قسم نامون پهريون ڀيرو ورتو پيو وڃي، اميدوار چونڊن ۾ ڪرپٽ پريڪٽس، آئين ۽ قانون جي خلاف ورزي نه ڪرڻ جو بيان جمع ڪرائيندا. اليڪشن ڪميشن پاران تيار ڪيل قسم نامي جو ڊرافٽ سامهون اچي ويو آهي، جنهن ۾ سينيٽ اميدوار ٽڪيٽ تي پئسا نه ڏيڻ جو يقين ڏياريندو. اميدوار ووٽ جي خريد ۽ وڪري لاءِ ڪنهن به ريت پئسن جو استعمال نه ڪرڻ وارو يقين لکت ۾ پيش ڪندو ۽ ان جيڪڏهن پارٽي ٽڪيٽ بابت رقم ڏني آهي ته اليڪشن ڪميشن کي آگاهه ڪندو. اميدوار اليڪشن ڪميشن کي ڪنهن به ريت اڪائونٽن جي جاچ جي اجازت ڏيندو ۽ اليڪشن ڪميشن کي لکت ۾ ضابطا اخلاق تي عملدرآمد ڪرڻ جو يقين ڏياريندو، اميدوار اوٿ ڪمشنر کان تصديق ٿيل قسم نامون جمع ڪرائيندو، جنهن تي اميدوار جي صحيح، آڱوٺي جو نشان ۽ سڃاڻپ ڪارڊ نمبر لکيل هوندو.
250
