اسلام آباد (ويب ڊيسڪ) سينيٽ چيئرمين محمد صادق سنجراڻي چيو آهي ته پاڪستان ريلويز سياحت جي فروغ ۾ اهم ڪردار ادا ڪري سگهي ٿي، ٽوئرسٽ سفاري ٽرين ان ڏس ۾ اهم قدم آهي. اهڙن خيالن جو اظهار هن ريلوي واري وفاقي وزير سينيٽر اعظم خان سواتي سان گڏ گولڙه ريلوي اسٽيشن تي سفاري ٽرين جو افتتاح ڪرڻ جي موقعي تي ڪيو. ٽوئرسٽ سفاري ٽرين هر جمعي، ڇنڇر ۽ آچر جي ڏينهن سياحن کي گولڙه اسٽين کان حسن ابدال، اٽڪ خورد ۽ اٽڪ سٽي ۽ ڀرپاسي جي جاين جي سير ڪرائيندي. سينيٽ چيئرمين چيو ته ٽوئرسٽ سفاري ٽرين حڪومت پاران مقامي سياحت جي فروغ لاءِ اهم قدم آهي، سفاري ٽرين جو تصور سٺو آهي. تفريح ۽ سياحت جو ذريعو بڻجي سگهي ٿو. ريلوي واري وزير سينيٽر اعظم سواتي چيو ته تاريخي گولڙه ريلوي اسٽيشن تان ٽرين قديم روٽ تي هلندي جنهن سان پاڪستان جو ثقافتي ۽ تاريخي ورثو ڏسڻ لاءِ ملندو. هن چيو ته پاڪستان ريلوي هڪ قيمتي اثاثو آهي، سينيٽ چيئرمين چيو ته ملڪ جي ٻين حصن ۾ به ان ٽرين کي آندو ويندو. هن چيو ته ريلوي واري وفاقي وزير محمد اعظم خان سواتي جون ڪوششون ساراهه جوڳيون آهن. سفاري ٽرين جي ڪري تاريخي ۽ ثقافتي ورثي کي اجاگر ڪرڻ ۾ مدد ملندي، سياحت جي فروغ ۾ پاڪستان ريلوي اهم ڪردار ادا ڪري سگهي ٿي. اميد آهي ته مستقبل ۾ به اهڙا قدم کنيا ويندا جنهن سان نه رڳو اداري کي منافعو ڏيندڙ بڻايو ويندو پر پاڪستان جو مثبت تشخص اجاگر ڪرڻ ۾ پڻ مدد ملندي. سينيٽر تاج محمد آفريدي، سينيٽر سجاد حسين طوري، مرزا محمد آفريدي، اورنگزيب اورڪزئي، نصيب الله بازئي، دلاور خان ۽ ٻين سياسي ۽ سماجي ماڻهن کانسواءِ عوام جو وڏو انگ گولڙه ريلوي اسٽيشن تي موجود هو. سينيٽ چيئرمين، وفد جي ميمبرن ۽ ريلوي واري وفاقي وزير سينيٽر اعظم خان سواتي ميوزيم جو دورو پڻ ڪيو. سينيٽ چيئرمين چيو ته ريلوي معيشت لاءِ ڪرنگهي جي هڏي جو درجو رکي ٿي. ريل جي بهتر رابطن سان ڪرايا به گهٽ ٿيندا ۽ ماحول تي به بهتر اثر پوندو. ريلوي واري وزير ٻڌايو ته فريٽ ٽرين به شروع ڪري رهيا آهيون. ان سان گهٽ خرچ ۾ اچ وڃ ۽ سامان جي پهچ جي سهولت ملندي. هن چيو ته ريلوي بهترين ادارو هو ۽ هڪ زماني ۾ ڪوئيٽا کان منهنجي ڳوٺ تائين مٺو پاڻي به ريلوي پهچائيندي هئي. ريلوي جي ترقي پاڪستان جي ترقي آهي. ريلوي جي ترقي جي لاءِ دعاگو آهيان. اعظم سواتي تقريب کي خطاب ڪندي چيو ته منهنجي ترجيحي ايجنڊا آهي ته ريلويز مان بدعنواني جو خاتمو ڪريان، ريلوي ۾ اڪثر سٺا آفيسر آهن جڏهن ته ڪجهه ڪاريون رڍون آهن، چونڊي چونڊي انهن ڪارين رڍن جو خاتمو ڪندس.
153
