لاڙڪاڻو(بيورو رپورٽ) زمبابوي خلاف قومي ٽيسٽ اسڪواڊ ۾ پھريون ڀيرو شامل ٿيڻ تي لاڙڪاڻي واسي نوجوان فاسٽ بالر شاھنواز ڏاھاڻي کي مبارڪون پيش ڪرڻ جو سلسلو جاري آهي. شاھنواز ڏاھاڻي جڏهن الشھباز ڪرڪيٽ ڪلب جي آفيس جي دوري تي پھتو ته کيس قومي ٽيسٽ اسڪواڊ ۾ شامل ٿيڻ تي الشھباز ڪرڪيٽ ڪلب جي چيف پيٽرن استاد محمد سليمان ميراڻي، سينيئر ڪرڪيٽرز عبدالرحيم ابڙو، شاھجھان کوکر ۽ نديم اختر سومرو کيس مبارڪون ڏيندي گلن جا هار پارايا. ھنن چيو ته شاھنواز ڏاھاڻي پنهنجي محنت سبب اڳتي وڌي رهيو آهي جنهن جي رھنمائي برقرار رکي ويندي. شاھنواز ڏاھاڻي چيو ته ٽيسٽ ٽيم ۾ شموليت منهنجي ۽ شھر لاڙڪاڻي لاءِ وڏو اعزاز آهي. والدين ۽ سينيئر ڪرڪيٽرز جي دعائن ۽ رھنمائي سان اڳتي وڌڻ جا موقعا ملي رھيا آھن. ھن چيو ته زمبابوي ۾ ڀرپور صلاحيتن جو مظاهرو ڪري سئو سيڪڙو ڪارڪردگي ڏيکارڻ جي ڪوشش ڪندس.
248
